مەسرور بارزانی، سەرۆکێ حکومەتا ھەرێما کوردستانێ، ئەڤرۆ 23 نیسانا 2021ێ پەیوەندییەکا تەلەفونی ژلایێ ئەنتۆنی بلینکن وەزیرێ دەرڤەیێ ئەمریکا گەھشتێ، د پەیوەندیێ دا گۆتوبێژ ل سەر چەندین بابەتان ھاتنە کرن و ژ وان ژی، رەوشا دەڤەرێ و ئاسایشا وێ و ھەردوو لایان ب تووندی ھێرشێن رۆکێت و فرۆکەیێن بێفرۆکەڤان دژی ھەرێما کوردستانێ و بنگەھێن ئیراقێ و ھێزێن ھەڤپەیمانییا ناڤدەولەتی شهرمزارکر.
ھەردوو لایەن ژی ھەڤ بۆچوون بوون سەبارەت پێدڤیاتییا دەڤەرێ ب ھێزێن ھەڤپەیمانییا ناڤدەولەتی ل ئیراقێ و شەرێ دژی داعشێ، ھەروەسا گرنگیدان ب ئێکرێزییا د ناڤبەرا ھێزو لایەنێن سیاسییێن کوردستانێ.
د تەوەرەکێ دییێ پەیوەندییێ دا بەحسێ پەسەندکرنا بۆدجەیێ گشتی ھاتەکرن و چاکسازیێن حکومەتا ھەرێما کوردستانێ، سهرۆكێ حكومهتا راگههاند، ئهو د چاڤەرێنە بەغدا ب زووترین دەم شایستەیێن دارایی یێن ھەرێمێ بھنێریت، سەرۆکێ حکومەتێ داخواز ژ وەزیرێ دەرڤەیێ ئەمریکا کر کو پشتگیریا حکومەتا ھەرێمێ بکەت د بوارێ تەکنیکی و پشتەڤانییا سەرمایەگۆزارییا ئەمریکا ل ھەرێما کوردستانێ و ب تایبەت د بوارێن بانکی و وەبەرھێنانێ.
ھەروەسا سەرۆکێ حکومەتێ و وەزیرێ دەرڤەیێ ئەمریکا، گۆتوبێژ ل سەر ھەلبژارتنێن داھاتییێن ئیراقێ کرن، ھەردوو لایان دلگرانییا خوە بەرامبەری گرۆپ و میلیشیایێن د یاسا دەرچووی دا دەربری، کو ئاریشە و ئاستەنگان بۆ ھەڤپشکییا ئەمریکا دگەل ئیراقێ و ھەرێما کوردستانێ و ئەنجامدانا ھەلبژارتنەکا ئازاد دروست دکەن، کو ئارمانجا ھەرێما کوردستانێ و ئیراقێ و جڤاکا ناڤدەولەتییە.
سەرۆکێ حکومەتێ داخوازکر کو ھەرێما کوردستانێ ب شێوەیەکێ دادپەروەرانە، پشکا خوە ژ قەرێن ناڤدەولەتی وەربگریت، کو ددەنە ئیراقێ.
ههر د ئهوێ پهیوهندییا تهلهفونی دا ھەردوو لایان جەخت ل سەر گرنگییا جێبەجێکرنا تەماما رێککەفتنناما شنگالێ کرەڤە.
