تورکیا ٣ خال ل دەڤەرا بەرواری بالا گرتن

ژێدەرەکێ ژ پاسەوانێن سنۆری بۆ خانی نیوز دیارکر: ژ ئەنجامێ ئۆپەراسیۆنا سوپایێ تورکیا بۆ دەڤەرا بەرواری بالا ل سنۆری قەزا ئامێدیێ، شڤێدی ل سێ خالێن سەرەکی ل زنارێ کێستە و سەرێ گۆندێ ھرۆرێ و دشێشێ گرتن.
وی ژێدەری نەڤیا ناڤێ وی بھێتە دیارکرن خویا ژى کر، زێدەتری سالەکێ یە تورکیا بزاڤێن گرتنا وان جھان دکەن، کو جھێن گرنگ وئستراتیژینە بۆ تورکیا وب گرتنا وان خالان دشێن کۆنترۆلێ ل سەر دەڤەرێ بکەن، گۆت ژی: شڤێدی ٩ کلیۆمەتران دەربازێ ناڤ ئاخا ھەرێمێ بووینە، ب رێکا فرۆکان سەربازێن خوە ل وان ھەر سێ خالان بنەجھکرینە.
گۆت ژی ژ ئەنجامێ وی ئۆپەراسیۆنێ چ زیانێن گیانی نەبووینە، لێ زیانێن مەزنێن مادی ب ژینگەھا وێ دەڤەرێ گەھاندینە و ترس و دو دلییەکا مەزن بۆ ئاکنجیێن دەڤەرێ دروستکریە.
ل گۆره‌ی زانیاریان پشتی ئۆپەراسیۆنا تورکیا یا بناڤێ په‌نجێن بلنکی یا سالا بووری بۆ سەر دەڤەرێن سنۆرێن ھەرێما کوردستانێ، تا نھا زێدەتری ٢٠٠ جاران زنارێ کێستە و ھرۆرێ و چیایێ دشێشێ ل دەڤەرا بەرواری بالا ھاتینە تۆپباران كرن.

ژلایێ خوه‌ڤە سەربەست سەبری، رێڤەبەرێ ناحیا کانی ماسێ بۆ خانی نیوز گۆت: وێ ئۆپەراسیۆنا سوپایێ توركیا نەئارامی ل دەڤەرێ دروستکریە و زیانێن مەزن ب رەز و بیستانێن گۆندیێن دەڤەرێ گەهاندیە.

خانى نیوز، عه‌بدوللا عه‌لى