په‌یاما سه‌رۆكی دگه‌هینیت كو هه‌رێمێ پێشمه‌رگێ هه‌ی و نابیته‌ ئه‌فغانستان

عه‌مید چیا شاره‌زایێ سیاسی و له‌شكه‌ری تایبه‌ت بۆ ئاژانسا خانی گۆت، په‌یاما سه‌رۆك بارزانی یا روونه‌ كو دیاردكه‌ت خه‌لكێ هه‌رێمێ باوه‌رییه‌كا مه‌زن ب پێشمه‌رگه‌ی هه‌ییه‌ و ئه‌ڤ باوه‌رییه‌ ژ وێ چه‌ندێیه‌ كو هه‌ماهه‌نگیه‌كا بهێز دناڤبه‌را پێشمه‌رگه‌ی و قیادا هه‌رێما كوردستانێ دا هه‌یه‌، ژ لایه‌كێ دیژی ڤه‌ په‌‌یاما سه‌رۆكی وێ چه‌ندێ دگه‌هینیت كو پێشمه‌رگه‌ رێكێ ناده‌ته‌ چ كه‌س و هێزێن غه‌ریب كو حوكمی ل هه‌رێمێ و خه‌لكێ وێ بكه‌ت، ژبه‌ركو هێزا پێشمه‌رگه‌ی هێزه‌كا رێكخستییه‌ و دشێت به‌رگریێ بكه‌ت و نه‌ د شیاندایه‌ هێزه‌كا ده‌ره‌كی بهێت و بشێت باوه‌ریێ بۆ پیشمه‌رگه‌ی و خه‌لكێ كوردستانێ دروست بكه‌ت كو بێژنێ باوه‌ریا خۆ ب حكومه‌ت و ده‌زگه‌هێن خو یێن حكومی نه‌ئینن.

عه‌مید چیا گۆت ژی، جوداهیه‌كا مه‌زن دناڤبه‌را هه‌رێما كوردستانێ و ئه‌فغانستانێ هه‌یه‌ ژ لایێ رێكخستنا له‌شكه‌ریڤه‌ ژبه‌ركو هه‌رێما كوردستانێ هێزه‌كا تایبه‌ت یا هه‌یی كو ناڤێ وێ پێشمه‌رگه‌یه‌ كو یا معترفه‌ ل سه‌ر ئاستێ ده‌ولی و ناڤێ خویێ هه‌ی و خودان مێژوویه‌كا مه‌زن و هێزه‌كا رێكخستییه‌، هنده‌ك كه‌س یان هێز هه‌ر هه‌نه‌ كو نه‌فسیه‌ته‌كا لاواز یا هه‌ی و ئه‌و هزر بۆ دهێن كو به‌رگریێ نه‌كه‌ن و ب ساناهی خوه‌ بفرۆشن لێ ئه‌وژی ڕێژه‌كا كێمه‌.

هه‌روه‌سا گۆت ژی، ئارامی و پاراستنا كوردستانێ د به‌رژه‌وه‌ندییا گشتییا عێراقێ و ده‌ڤه‌رێدایه، و ئه‌و باوه‌رناكه‌ت نه‌ عیراق و نه‌ ده‌وله‌تێن ده‌ورۆبه‌ر و نه‌ ئورۆپا و ئه‌مریكا وێ جه‌ساره‌تێ بده‌نه‌ خو و هه‌ول بده‌ن كو هه‌رێما كوردستانێ تێك بده‌ن، ژبه‌ركو تێكدانا كوردستانێ دێ ب گران راوه‌ستیت ل سه‌ر هه‌میان.