حه‌مید حاجى : دێ سه‌ركه‌فتنا خوه‌ ل سه‌ر یانا ته‌له‌به‌ دوباره‌ كه‌ین

ئاژانسا خانى ، عامر حه‌سه‌ن 
سوباهى تیما یانا زاخۆ چاڤه‌رێ تۆماركرنا سه‌ركه‌فتنا خوه‌ یا دووێ یه‌ لدووڤ ئیك دماوێ حه‌فتیه‌كێ ده‌مێ یاریا خوه‌ دوباره‌ دگه‌ل مێهڤانا خوه‌ یانا ته‌له‌به‌ دكه‌ت، به‌لێ ڤێ جارێ ژ كاسا عێراقێ یا ته‌پاپێى ژچارچوڤێ قوناغا 32 ژقاره‌مانیێ.

حه‌مید حاجى یاریزانێ یانا زاخۆ لدۆر پێشبینى و به‌رهه‌ڤیێن تیما خوه‌ بۆ ئاژانسا خانى گوت: ئه‌م هه‌ست دكه‌ین رۆژ بۆ رۆژێ ئاستێ یاریزانێن مه‌ به‌ره‌ڤ قوناغێن باشتر ب رێڤه‌چیت.

هه‌روه‌سا دیاركر، كو یارى بۆ یارى دڤێت ئه‌م باشتر خوه‌ ماندى بكه‌ین و هه‌ست به‌رپرسیاره‌تیێ بكه‌ین ، كادرێ راهێنانێ ژى بۆ هه‌ر یاریه‌كێ پلانێن جودا هه‌نه،‌ راسته‌ دڤێ قوناغا چ تیم ب ساناهى نین، ژبه‌ركو هه‌میا پێكڤه‌ حه‌زا سه‌ركه‌فتنێ و ده‌ربازبوونێ بۆ قوناغێن باشتر هه‌یه، دیسان مه‌ چ جوداهى دناڤبه‌را خول و كاسێ دا نینه‌ هه‌ردوو قاره‌مانى بۆ مه‌ دگرنگن ، ب هێڤیا هندێ یاریزانێن مه‌ پتر رۆلێ خوه‌ دیاریێ دا بینن بشێن پلێتا ده‌ربازبونێ بۆ قوناغا 16 وه‌ك نوونه‌را دهۆكێ وه‌ربگرین.