پارتا گشتی یا دیمۆکراتا کوردستانا ئیرانێ دەنگۆیه‌كی رەت دکەت

ڕاگەهاندنا پارتا گشتی یا دیمۆکراتا کوردستانا ئیرانێ وان دەنگۆیێن تێکچوونا دانوستاندنان د ناڤبەرا واندا رەتدکەت و راگه‌هاند؛ ب تنێ هندەک ئاریشێن بچووک د ناڤبەرا واندا ماینە کۆ لسەر باخڤن.

مستەفا هیجری، بەرپرسێ گشتی یێ پارتا دیموکراتا کوردستانا ئیرانێ راگەهاند، هەتا نەوروزێ چ تشت نامینن ل سەر باخڤن و ئاماژە ب هندێ ژی کر کۆ پۆستێ کەسێ ئێکێ یێ پارتا دیموکراتا کوردستانێ هاتیە دیارکرن.

مستەفا هیجری د هەڤپەیڤینەکێدا، بەرسڤا هندەک پرسیاران دەربارەی ئێکگرتنا هەردوو پارتێن دیموکراتا کوردستانێ و دیمۆکراتا کوردستانا ئیرانێ و ئاستەنگێن د رێیا ئێکگرتنا واندا بەحسکر.

دەربارەی ئێکگرتنا هەردوو پارتان گۆت: ماوەیەکێ زۆرە د گفتوگویانداینە، مە بەحس ل گەلەک تشتان کریە، و ئەوێن ماین ژی د گفتوگویێن بهێتدا دێ بەحس کەین، ئەگەر هەتا نەورۆزا ئەڤ سالە ب دووماهیک نەهێن رامانا وێ چ تشت نامینن بەحس بکەین.

دەربارەی وان دەنگۆیان ژی یێن دبێژن ئاستەنگ هەنە د رێیا ئێکگرتنا هەردوو پارتاندا مستەفا هیجری دبێژیت: چ ئاستەنگ نینن، ئەڤرۆ شاندێن مە دگەل ئێکدا روینشتینە بۆ بەردەوامبوونا گفتوگۆیان، بەلێ هندەک جاران خالێن وەسا دهێنە پێش کو پتر پێدڤی ب شرۆڤەکرنێ نە.

دەربارەی پوستێ ئيکێ یێ پارتێ ژی پشتی ئێکگرتنێ، بەرپرسێ گشتی یێ پارتا دیموکراتا کوردستانا ئیرانێ گۆت: ئەڤ پرسە ژ مێژە هاتییە ئێک لاکرن و گۆتن ل سەر نەمایە.