ل دووماهییا سالا بهێت سه‌رژمێریارییا گشتى دێ هێته‌كرن

حكومه‌تا عیراقێ بریاردا ل دووماهییا سالا بهێت سه‌رژمێرییا گشتى بهێته‌كرن و سه‌رۆكێ ده‌سته‌یا ئامارا هه‌رێما كوردستانێ دبێژیت: بریار هێشتا یا ل ده‌ستپێكا خوه‌ و دبیت هه‌تا ئه‌و ده‌مێ بۆ هاتییه‌ ده‌ستنیشانكرن چه‌ند ئاسته‌نگ بۆ درووست ببن.

سه‌رۆكێ ده‌سته‌یا ئامارا هه‌رێما كوردستانێ سیروان محه‌مه‌د بۆ ئاژانسا خانى دیاركر، ل رۆژێن بووریدا كۆمبوونا پێنجێ یا ده‌سته‌یا بلند یا سه‌رژمێریارییا عیراقێ برێڤه‌چوو، و ئه‌وژى وه‌ك نوونه‌رێن هه‌رێما كوردستانێ تێدا دپشكداربوون، وه‌زیرێ پلاندانانێ ل كۆمبوونا بوورى ئاماژه‌ ب هندێ كر كو ب شێوه‌یێ ده‌ستپێكێ بریار هاتییه‌ دان ل پایزا سالا بهێت پرۆسه‌یا سه‌رژمێرییا گشتى ل عیراقێ برێڤه‌چیت، لێ پرۆسه‌یا حكومه‌تا نوو یا عیراقێ كاریگه‌رى هه‌یه‌ و ره‌نگه‌ وه‌زیرێ بهێت یێ پلاندانانا عیراقێ هه‌مان بوچوون ده‌رباره‌ى برێڤه‌چوونا سه‌رژمێرییێ نه‌بیت، له‌وما ئه‌و دبێژن بریارا یا ده‌ستپێكى یه‌.

سیروانه محه‌مه‌دى ئاماژه‌ ب هندێ ژى دا، ئه‌وا نوكه‌ ل به‌ر ده‌سته‌ و بریار ل سه‌ر هاتییه‌ دان ئه‌وه‌ كو ئه‌گه‌ر ئاسته‌نگ درووست نه‌بن، سه‌رژمێرییا گشتى دێ ل دووماهییا سالا بهێت ده‌ستپێكه‌ت.