مه‌سروور بارزانى په‌یوه‌ندییێن هه‌رێمێ و حكومه‌تا فیدرال دگه‌ل بالیۆزێ بریتانیا كوتوبێژكرن

ئه‌ڤرۆ مه‌سروور بارزانى، سه‌رۆكێ حكومه‌تا هه‌رێما كوردستانێ پێشوازى ل مارك برایسون، بالیۆزێ برتانیا ل عیراقێ و شاندێ دگه‌لدا كر.

د دیدارێ دا كۆ به‌رێز ده‌یڤد هانت، كۆنسولێ گشتى یێ بریتانیا ل هه‌رێما كوردستانێ ئاماده‌بوو، تێدا دوماهى پێشهاتێن ره‌وشا عیراقێ و پێشڤه‌برنا په‌یوه‌ندییێن هه‌رێما كوردستانێ و بریتانیا هاتنه‌ گۆتۆبێژكرن.

هه‌روه‌سا هه‌ردوولا ل سه‌ر گرنگییا چاره‌سه‌ركرنا كێشه‌یێن هه‌لاویستى یێن دناڤبه‌را هه‌رێما كوردستانێ و حكومه‌تا فیدرالى دا ب تایبه‌تى ل سه‌ر پرسا گاز و په‌ترۆلێ ل سه‌ر بنه‌مایێ ده‌ستوورى د هه‌ڤرا بوون.

دۆپاتى ژى هاته‌كرن كۆ هه‌رێما كوردستانێ پابه‌ندییێن خۆه‌ د چارچووڤێ ده‌ستوورى دا بجهـئیناینه‌ و پێدڤییه‌ حكومه‌تا فیدرالى رێزێ ل مافێن ده‌ستوورى یێن هه‌رێمێ بگریت و وه‌ك قه‌و‌اره‌یه‌كێ فیدرالى ره‌فتارێ دگه‌ل هه‌رێما كوردستانێ دا بكه‌ت.
هه‌روه‌سا دۆپاتى ل وێ یه‌كێ هاته‌كرن كۆ هه‌رێما كوردستانێ بۆ گۆتۆبێژان یا ئاماده‌یه‌ بۆ گه‌هشتنێ ب رێكه‌فتنه‌كێ كۆ ماف و شایستێن ده‌ستوورى یێن هه‌رێما كوردستانێ تێدا د پاراستى بن و دبه‌رژه‌وه‌ندییا هه‌موو وه‌لاتییێن عیراقێ دا بیت.