ئێکەتییا قوتابییان بێ بەرامبەر فۆرما زانکۆلاین پر دکەت

ئاژانسا خانی ” تایبەت:

پێنج سالن ئێکەتییا قوتابیێن کوردستانێ بێ بەرامبەر و ب رێیا چەندین سەنتەر و نڤیسینگەھێن خوە فۆرما زانکۆلاین بێبەرامبەر بۆ قوتابیان تۆمار دکەت و سکرتێرێ وێ رێکخراوێ دبێژیت، ھەموو مەزاختیێن پڕۆژەیی ژلایێ بارەگایێ بارزانی ھاتینە دابین کرن.

نێچیرڤان کەلاری، سکرتێرێ ئێکەتییا قوتابیێن کوردستانێ بۆ ئاژانسا خانی دیار کر” ئێکەتییا قوتابیێن کوردستانێ مینا سالێن بۆری ب سیستەمەکێ رێکوپێک و ب رێیا کادرێن شارەزا ل سەرانسەری ھەرێما کوردستانێ ژلایێ لق و نڤیسینگەھێن ئێکەتییا قوتابییان ھژمارەکا خزمەتگوزارییان ل دۆر پرۆسا زانکۆلاین پێشکێشی قوتابیان دھێنە کرن، ژ بلی پرکرنا فۆرما زانکۆلاین بێ بەرامبەر ژلایێ کەسێن شارەزا ھەروەسا شیرەتان ددەینە قوتابییان ل دۆر چاوانیا پرکرنا فۆرما زانکۆلاین، چونکی دەستپێکێ مە دڤێت قوتابی بەرچاڤ روونی ھەبیت، کو نمرا وی قوتابی زێدەتر ل کیژ پشکێ دێ ھێتە وەرگرتن.

نێچیرڤان کەلاری گۆت ژی” دەمێ فۆرم دھێتە پرکرن ناھێتە تۆمارکرن ل سیستەمی ھەتا قوتابی پشتڕاست دبیت، پشتی بڕیارا دووماھییێ ژلایێ قوتابی ب شێوەکێ سەرکەفتی دێ فۆرما قوتابی ل سیستەمێ وەرگرتنا قوتابیان ھێتە تۆمار کرن، ھەموو ئەو خزمەت گوزاریێن دھێنە پێشکێش کرن ژلایێ بارەگایێ بارزانی ڤە مەزاختیێن مادی دھێنە دان، واتە ھەموو چ پارە ژ قوتابی ناھێتە وەرگرتن و ھەموو مەزاختی ل سەر ئەرکێ بارەگایێ بارزانینە.