تیمه‌كا ئه‌لمانى یا ئاگر ڤه‌مراندنێ دێ خۆلێن چه‌وانییا ئاگر ڤه‌مراندنێ ل دهۆكێ ڤه‌كه‌ت

تیمه‌ك ژ باژارێ Tuttlingen یێ ئه‌لمانی بو پێشكێشكرنا خولێن چه‌وانییا ئاگرڤه‌مراندنێ و كه‌لوپه‌لێن پێتڤی ل پارێزگەھا دهوكێ یه.

‌ئه‌كاونتێ فه‌یسبۆكى یێ پارێزگه‌ها دهۆكێ راگه‌هاند، پشتی سه‌ره‌دانا  پارێزگارێ دهۆكێ د.عه‌لی ته‌ته‌رى بو وه‌لاتێ ئه‌لمانیا و دچارچوڤێ وێ ده‌سته‌خوشكییا پارێزگه‌ها دهوكێ دگه‌ل باژارێ Tuttlingen یێ ئه‌لمانی دا، ترومبێله‌كا پێشكه‌فتی یا ئاگرڤه‌مراندێ بۆ پاراستنا ژیانا وه‌لاتییان ب دیاری پێشكێشی پارێزگه‌ها دهوكێ كربوو، نوكه‌ تیمه‌ك ژ ئه‌وی باژاری ل پارێزگه‌ها دهوكێیه‌ و دێ خولێن چه‌وانییا ئاگرڤه‌مراندێ بۆ كارمه‌ندێن هه‌وارهاتنێ و كه‌لوپه‌لێن پێتڤی پێشكێشی پارێزگه‌هێ كه‌ن.

هه‌روه‌سا پارێزگه‌هێ دیاركر، هه‌ر د ئه‌وی چارچوڤه‌یدا پێشتر ژی ئاژانسا فیدرالی یا ئه‌لمانیا بۆ هه‌ڤكارییێن ته‌كنیكی ب هه‌ڤكارییا رێكخراوا ( THW ) خوله‌كا ئونلاین دنافبه‌را هه‌ر دو پارێزگه‌هێن دهوك و شتودگارد دا ژی بۆ ئه‌وان كارمه‌ندێن كار ب ئه‌وان هه‌ردو ترومبێلێن ئاگرڤه‌مراندنێ دكه‌ن یێن ژ وی باژاری ژی گه‌هشتینه‌ پارێزگه‌ها دهوكێ ڤه‌كربوو، ئه‌ڤه‌ژی بۆ پاراستنا گیانێ وه‌لاتییان و سه‌ره‌ده‌رییه‌كا ساخله‌م دگه‌ل رودانێن ئاگر یه‌.