پەرلەمانتارەکا پارتی: هێشتا ژڤانێ ھەلبژارتنــا سەرۆک کــۆماری نەھاتییە ئێکـلا کــرن

ئاژانسا خانی ، تایبەت:

ھەر چەندە بەرپرسێ نڤیسینگەھا نوری مالکی ئاشکرا کرییە” ل رۆژا چارشەمبی دێ پەرلەمانێ عیراقێ سەرۆک کۆماری ھەلبژێریت” بەلێ پەرلەمانتارەکا پارتی رەتکر” كو ژڤانێ ھەلبژارتنا سەرۆک کۆماری ھەتا نوکە ھاتبیتە ئێکلا کرن و دبێژیت، ب فەرمی ژڤانێ ھەلبژارتنا سەرۆک کۆماری نەھاتییە دیارکرن.

یادگار مەحموود، پەرلەمانتارا فڕاکسیۆنا پارتی ل جڤاتا نوونه‌رێن عیراقێ” بۆ ئاژانسا خانی دیار کر” ھێشتا ژڤانێ ھەلبژارتنا سەرۆک کۆماری نەھاتییە دیار کرن و ب تنێ ل دەزگەھێن راگەھاندنێ ھاتییە بەلاڤکرن” كو دێ ل رۆژا چارشەمبی سەرۆک کۆمار ھێتە ھەلبژارتن، بەلێ ب فەرمی ژڤانێ کۆمبوونا پەرلەمانی نەھاتییە دیار کرن، چونکی لدووڤ پەیڕەوێ ناڤخۆ دڤێت کۆمبوونا پەرلەمانی بھێتە دیار کرن و ئەجێندایێن کۆمبوونێ ژی دیار بن ھەتا نوکە بەحسێ کۆمبوونا چارشەمبی و کارناما کۆمبوونێ ژی نەھاتییە کرن.

ناڤهاتییێ گۆت ژی” ل سەر ئاستێ ھەرێما کوردستانێ دانوستاندن ھەنە بۆ ئێکلا کرنا بەربژارێ پۆستێ سەرۆک کۆمارێ عیراقێ، ل سەر ئاستێ عێراقێ ژی دانوستاندن د بەردەوامن بۆ پێکئینانا حوکمەتا نوو یا عیراقێ، ب تایبەتی چارچوڤێ ھەماھەنگییا شیعی دخوازیت موقتەدا سەدر بھێتە رازیکرن بۆ پێکئینانا حوکمەتێ، چونکی ئەگەر سەدر رازینەبیت ل سەر پێکئینانا حوکمەتێ” هه‌كه‌ حوكمه‌ت بھێتە پێکئینان ژی سەرناگریت.