سەرۆكێ ژۆرا هەڤپشك یا بازرگانییا ئیرانێ و عیراقێ دۆپاتكر، سەرەدانا ڤان دوماهییان یا شاندێ بلند یێ كۆمارا ئیسلامی یا ئیرانێ بۆ هەرێما كوردستانێ ئەنجامێن گرنگ ب دەستڤەئیناینە.
یەحیا ئالیئیسحاق، سەرۆكێ ژۆرا هەڤپشك یا بازرگانییا ئیرانێ و عیراقێ بۆ ئاژانسا ئیلنا یا دەنگۆباسان یا ئیرانی راگەهاند، شاندەكێ بازرگانی ب سەرۆكاتییا جێگرێ وەزیرێ دەرڤە بۆ كاروبارێن ئابووری سەرەدانا هەرێما كوردستانێ كر و ئەنجامێن گەلەك باش ب دەستڤەئیناینە.
هەرچەندە یەحیا ئالیئیسحاق هویركاتییێن وان ئەنجامێن باش روون نەكرینە، لێ دیاركرییە كو بریارە ل هەیڤا بهێت پێشانگەها كومپانییێن ئیرانی ل هەرێما كوردستانێ بهێتە ڤەكرن.
رۆژا 19ی چریا ئێكێ، شاندەكێ ئیرانی سەرەدانا هەرێما كوردستانێ كربوو و جودا لگەل سەرۆك وەزیرێن هەرێمێ و جێگرێ سەرۆكێ پەرلەمانی و چەند بەرپرسەكێن دی كۆمبوون. د كۆمبوونێ دا حكومەتێن هەولێرێ و تەهرانێ دۆپاتی ل پێشڤەبرنا پەیوەندییێن بازرگانی و پێشكێشكرنا ئاسانكارییان بۆ بازرگانان و وەبەرهێنانێ و نەهێلانا ئاستەنگێن بەرامبەر لڤینا بازرگانی كر.
