وهزیرێ دهرڤه گوت : بهرى حكومهتا نوو یا عیراقێ بهێته پێكئینان، حكومهتا ههرێمێ و حكومهتا ناڤهندى لسهر چارهسهركرنا ههموو ئاریشهیێن ههرێما كوردستانێ ب بابهتێن نهفت و ئێمناهییێ ژیڤه رێككهڤتینه.
فوئاد حسێنى دووپات كر، ل دهمێ بوورى كۆمهكا ئاریشهیێن ههلاویستى دناڤبهرا ههولێر و بهغدا دا ههبوو، و هندهك ژ وان پهیوهندى ب دهستووریڤه ههبوو، وهك ماددهیێ 140 و دهڤهرێن كێشه لسهر و ماددهیێ 110 یێ قانوونا نهفت و گازێ و ناكوكییێن لسهر سیاسهتا نهفتێ دناڤبهرا ههردوو لایان دا و كێشهیا ههرێمێ دبودجهیا دارایدا.
سهبارهت دهست تێوهردانێن ئیران و توركیا، وهزیرێ دهرفه یێ عیراقێ ئاشكراكر، ئهو وهك حكومهتا عیراقێ دهست تێوهردانێن ئیران و توركیا ل ناڤا وهلاتى رهت دكهن، و بزاڤێ دكهن خالێن ناكووك دگهل وهلاتێن جیران ب رێكا دیالۆگێ چارهسهربكهن، و عیراقێ دڤێت ب شێوهیهكێ گشتى پهیوهندییێن خوه دگهل وهلاتێن جیران و ژ دهرڤه باشتر لێبكهت، پهیاما عیراقێ پهیاما ئاشتییێ یه، لهوما ئهو رهت دكهن ئاخا عیراقێ ببیته مهیدانا ههڤركییێن ههرێمى و نێڤدهولهتى.
