فره‌نسا به‌رهه‌ڤییا خوه‌ بۆ هه‌ماهه‌نگییێ ل دانوستاندنێن دناڤبه‌را هه‌ولێر و به‌غدا دا نیشاندا

كۆنسۆلخانه‌یا فره‌نسا ل هه‌رێما كوردستانێ به‌رهه‌ڤییا خوه‌ بۆ هه‌ماهه‌نگییێ ل دانوستاندنێن دناڤبه‌را حكومه‌تێن هه‌ولێر و به‌غدا دا ب مه‌ره‌ما چاره‌سه‌ركرنا ئاریشه‌یێن دارایى و به‌شه‌ بودجه‌یا هه‌رێما كوردستانێ نیشاندا.

ئاوات جه‌ناب نوورى وه‌زیرێ دارایى و ئابوورى ئه‌ڤرۆ 22ى چریا دووێ یا 2022ێ ل دیوانا وه‌زاره‌تێ پێشوازى ل شاندێ كۆنسۆلێ گشتییێ فره‌نسا ل هه‌رێما كوردستانێ كر و دانوستاندن ل دۆر چاره‌سه‌ركرنا ئاریشه‌یێن هه‌ولێر و به‌غدا كر.

شاندێ فره‌نسا ژ رودولف ریچالد جێگرێ كۆنسۆلێ گشتییێ فره‌نسا ل هه‌ولێرێ، هوگو بوگێل شیره‌تكارێ دارایى بۆ رۆژهه‌لاتا ناڤه‌راست و كامى شابى پاشكۆیێ ئابوورى یێ بالیۆزخانه‌یا فره‌نسا ل به‌غدا پێكهاتبوو.

ئارمانجا سه‌ره‌دانێ ئاگه‌هداربوون ژ ده‌ستپێكرنا دانوستاندنێن دناڤبه‌را حكومه‌تا هه‌رێما كوردستانێ و حكومه‌تا به‌غدا دا ل دۆر پرۆژه‌ قانوونا بودجه‌یا 2023ێ و چاره‌سه‌ركرنا كه‌یسا نه‌فت و غازێ بوو.

د دیدارێدا ئاوات جه‌ناب نوورى وه‌زیرێ دارایى و ئابوورى یێ حكومه‌تا هه‌رێما كوردستانێ، زێده‌بارى بخێرهاتنا شاندێ مێڤان، سوپاسییا حكومه‌تا فره‌نسا كر كو هه‌رده‌م و ب درێژاهییا مێژوویێ پشته‌ڤانا پرسێن گه‌لێ كوردبوو.

د كۆمبوونێدا وه‌زیرێ دارایى و ئابوورى گوت: بریاره‌ ل ڤان نێزیكان سه‌ره‌دانا به‌غدا بكه‌ن بۆ ئێكلاكرنا بابه‌تان و دگه‌شبینن كو رێككه‌ڤتن ل ناڤبه‌را هه‌رێما كوردستانێ و به‌غدا لسه‌ر بدووماهى ئینانا ئاریشه‌یان بهێته‌كرن.

ژلایێ خۆڤه‌ شاندێ مێڤان بۆ وه‌زیرێ دارایى و ئابوورى دیاركر، ئه‌و دبه‌رهه‌ڤن هه‌ماهه‌نگییێ ل دانوستاندنان بكه‌ن ب مه‌ره‌ما چاره‌سه‌ركرنا ئاریشه‌یێن دارایى یێن به‌شه‌ بودجه‌یا هه‌رێما كوردستانێ.