<h2 style="text-align: center;">پشتی ژییێ 35 سالییێ، پێدڤییە تو پێنج پشکنینان بکەیی</h2> <h2 style="text-align: center;">دکتۆرە "شێلی ماهاجان"، بسپۆڕا هندی د زانستێ نەخۆشییان و جینۆمێ کلینیکی دا، شیرەتان ل وان كەسان دكەت یێن كو ژییێ وان پتری 35 سالییێ، کو ب شێوەکێ خولی و بەردەوام پێنج جۆرێن پشکنینێن نۆشداری ئەنجام بدەن بۆ پشتڕاستبوون ژ ساخلەمیا خۆ. بۆچی ژییێ 35 سالییێ؟ ب گۆتنا ڤێ دکتۆرێ، پشتی 35 سالییێ لەشێ مرۆڤی کێمتر دشێت خۆ لبەر کاریگەریێن وەستیانێ، سترێسێ، کێم خەوییێ، کێم لڤینێ و سیستەمێ نەڕێک یێ خوارنێ بگریت، رەنگە مرۆڤ ل رووخساری دا هەست ب چو ئاریشان نەکەت، بەلێ د ڤێ قووناغێ دا هندەک تێکچوونێن ساخلەمیێ ل ناڤخۆیا لەشی دەستپێدکەن کو ب تنێ ب رێیا پشکنینان دهێنە دیتن و چارەسەرکرن. پشکنینێن پێشنیارکری ئەڤەنە: . پشکنینا ئاستێ شەکرێ ئەڤە ل سەرێ لیستێ یە، چونکی هاریکارە بۆ دەستنیشانکرنا پێشوەخت یا نەخۆشیا شەکرێ، یان وان نیشانان یێن کو ئاماژەنە بۆ ئەگەرێ تووشبوونێ ب ڤێ نەخۆشیێ د پاشەرۆژێ دا. . ساخلەمیا دل و خوینبەران ئەو نۆشدارە دبێژیت، پێدڤییە ئاستێ "کۆلیسترۆل" و " فشارا خوینێ" بهێتە پیڤان، چونکی پشتی ژییێ 35 سالییێ مەترسیا جەلتەیا دلی و مەژی زێدە دکەت، ئەڤ پشکنینە رێگریێ ل ڤان مەترسییان دکەن. . فەرمانێن مێلاك و گولچیسکان ئاریشێن مێلاك و گولچیسکان گەلەک جاران بۆ دەمەکێ درێژ ب ڤەشارتی دمینن و چ نیشان نینن، لەوما پشکنینا خولی دبیتە ئەگەرێ دیتنا هەر گرفتەکێ بەری بگەهیتە قووناغەکا مەترسیدار. . پشکنینا غودا دەرەقی غودە وەک "رێکخەرێ سەرەکی یێ سۆتنا وزەیێ" د لەشی دا کار دکەت. گەلەک جاران ئاریشێن غودێ وەک وەستیان، دودلی و کێمبوونا وزەیێ دیار دبن، کو مرۆڤ هزر دکەت ب تنێ وەستیانەکا ئاسایی یە، بەلێ د راستی دا تێکچوونا هۆرمۆنانە. . ڤیتامینێن D3 و B12 کێمبوونا ڤان هەردو ڤیتامینان رەنگە نەبیتە ئەگەرێ نەخۆشییەکا کوژەک، بەلێ دبیتە ئەگەرێ بێهێزییەکا بەردەوام، تێکچوونا مەزاجی و کێمبوونا شیانا کارکرنێ، کو ئەڤە ژی کوالێتییا ژیانا مرۆڤی تێکددەت. ئەنجامدانا ڤان پشکنینان دەمەکێ کێم دڤێت، بەلێ دبیتە ئەگەرێ هندێ کو تو ژیانەکا ساخلەمتر بژی و پێشوەخت رێگریێ ل نەخۆشیێن درێژخایەن بکەیی.</h2>
