ئاكنجییێن عیراقێ دێ گه‌هنه‌ 50 ملیۆن كه‌سان

وه‌زاره‌تا پلاندانانا عیراقێ ئاشكراكر، ئه‌ڤ ساله‌ رێژه‌یا ئاكنجییێن عیراقێ دێ بیته‌ 42 ملیۆن كه‌س و بۆ سالا 2030ێ دێ گه‌هیته‌ 50 ملیۆن كه‌سان.

عه‌بدولزه‌هره‌ هینداوى، په‌یڤدارێ وه‌زاره‌تا پلاندانانا عیراقێ راگه‌هاند، ژماره‌یا ئاكنجییێن عیراقێ هه‌تا دووماهییا سالا 2021ێ ژ 41 ملیۆن كه‌سان بووریبوو وپێشبینى دهێته‌كرن هه‌تا دووماهییا ئه‌ڤ ساله‌ بگه‌هیته‌ 42 ملیۆن كه‌سان.

ئاشكرا ژى كر، ئه‌و پێشبینى دكه‌ن هه‌تا دووماهییا سالا 2030ێ ژماره‌یا ئاكنجییێن عیراقێ بگه‌هیته‌ 50 ملیۆن كه‌سان.

عه‌بدولزه‌هره‌ هینداوى روون ژى كر، ئاكنجییێن عیراقێ برێژه‌یا 64%ێ ژییێ وان دسه‌ر 15 سالییێدانه‌، و 50.3%ێ یا وێ رێژه‌یێ ژ ره‌گه‌زێ نێرن و 49.7% مێ نه‌، و گه‌نج دناڤبه‌را 15 بۆ 24 سالییێ دا 24%ێ پێكدهێن، و ئه‌وێن ژییێ وان 25 سال و سه‌ردا 43%ێ یا ئاكنجییێن عیراقێ پێكدئینن.

به‌حس ل هندێ ژى كر، هێزا كارى ل عیراقێ نێزیكى 43%ێ یه‌ كو ژ 10 ملیۆن كه‌سان زێده‌تره‌ وب تنێ 11%ێ ژنن.

پلاندانانا عیراقێ ئاشكراكر، ژماره‌یا كرێكاران ل عیراقێ نه‌هـ ملیۆن كه‌سن، كو 84%ێ یا سه‌رجه‌مێ هێزا كارى پێكدئینن و رێژه‌یا كرێكاران ل كه‌رتێ حكومى 38%ێ یه‌، دبه‌رامبه‌ردا 62%ێ ل كه‌رتێ تایبه‌ت كار دكه‌ن.