مه‌سرور بارزانى  و بالیۆزێ ئێكه‌تییا ئورۆپا ل عیراقێ كۆمبوون

مه‌سرور بارزانى سه‌رۆكێ حكومه‌تا هه‌رێما كوردستانێ و ڤیلله‌ ڤاریۆلا بالیۆزێ ئێكه‌تییا ئورۆپا ل عیراقێ كۆمبوون و پێشڤه‌برنا هاریكارى و هه‌ماهه‌نگییا دناڤبه‌را هه‌رێما كوردستانێ و ئێكه‌تییا ئورۆپادا گوتوبێژكرن.

سایتێ حكومه‌تا هه‌رێما كوردستانێ راگه‌هاند، ئه‌ڤرۆ 13ى كانوونا ئێكێ یا 2022ێ مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل ڤیلله‌ر ڤاریۆلا بالیۆزێ ئێكه‌تییا ئورۆپا ل عیراقێ كر، و د دیدارا واندا كو توركیلد بیۆك به‌رپرسێ نوو یێ نڤێسینگه‌ها ئێكه‌تییا ئورۆپا ل هه‌رێما كوردستانێ ژى تێدا یێ به‌رهه‌ڤبوو، سه‌رۆكێ حكومه‌تێ پیرۆزباهییا ده‌ستبكاربوونێ لێكر و داخوازا سه‌ركه‌ڤتنێ بۆ كر.

ل دووڤ راگه‌هاندنا سایتێ حكومه‌تا هه‌رێما كوردستانێ، ته‌وه‌ره‌كێ سه‌ره‌كى یێ كۆمبوونێ یێ تایبه‌ت بوو ب پێشڤه‌برنا هاریكارى و هه‌ماهه‌نگییا دناڤبه‌را هه‌رێما كوردستانێ و ئێكه‌تییا ئورۆپادا، ب تایبه‌ت پشته‌ڤانیكرنا چاكسازییێن كابینه‌یا نه‌هێ ل بوارێ هه‌مه‌جووركرنا ئابوورى و پشته‌ڤانیكرنا كه‌رتێ چاندنێ و په‌یداكرنا بازارێن ده‌ره‌كى و هنارده‌كرنا به‌رهه‌مێن نافخوه‌ یێن كوردستانێ بۆ بازارێن ئورۆپا، هه‌روه‌سا به‌حس ل گرنگرییا چاكسازیكرنێ ل سیسته‌مێ بانكێن كوردستانێ و ده‌رفه‌تێن هاریكارییا ئێكه‌تییا ئورۆپا دڤى بواریدا هاته‌كرن.

دبه‌شه‌كێ دییێ دانوستاندناندا، چاره‌سه‌ركرنا ئاریشه‌یێن هه‌رێما كوردستانێ و حكومه‌تا فیدرال ل سه‌ر بنه‌مایێن ده‌ستوورى هاتنه‌ گوتوبێژكرن.

دڤى بواریدا مه‌سرور بارزانى حه‌زا هه‌رێما كوردستانێ بۆ چاره‌سه‌ركرنا ئاریشه‌یان دووپاتكر و ئاماژه‌ ب هندێ دا، ته‌رخانكرنا شایسته‌یێن دارایى یێن هه‌رێما كوردستانێ دبودجه‌یا فیدرالیدا بۆ سالا 2023ێ بشێوه‌یه‌كێ دادپه‌روه‌رانه‌ و ل دووڤ رێژه‌یا ئاكنجییێن هه‌رێمێ و ل سه‌ر بنه‌مایێن ده‌ستوورى، دشیاندایه‌ ببیته‌ ده‌ستپێكه‌كا باش بۆ ئاراسته‌یێ چارسه‌ره‌كرنا بنه‌ره‌تى یا هه‌موو ئاریشه‌یێن دناڤبه‌را هه‌رێما كوردستانێ و حكومه‌تا فیدرالدا.