مستەفا کازمی، سەرۆکوەزیرێن پێشتر یێ عیراقێ، دەربارەی وان تومەتێن ئاراستەی وی دهێنە کرن، ل دوور ئەشکەنجەدانا زیندانییان و وەرگرتنا دانپێدانێن بەرپرس و بازرگانان ل بن فشاران و ئەشکەنجەدانێ، بەیاننامەیەک بەلاڤکر و ڕاگەهاند،” ئەو تومەتە د بێ بنەمانە و دخوازین ئەوێن بەڵگەیێن یاسای و باوەرپێکری و پشتراسکری هەنە دیاربکەن.”
د بەیاننامێ دا، کو ژ پێنج خالان پێکهاتییە مستەفا کازمی، رەتکریە، هیچ کەسەک بێی بڕیارا دادگەهێ دەستەسەر کربیت و ئەشکەنجە دابیت.
کورتییا خاڵان:
ئێک: مە گەلەک گرنگی ب پاراستنا مافێن مرۆڤی دایە، ل دەمێ ڤەکۆلینێ و پشتی هنگی ژی رێز ل مافێن مرۆڤی هاتیە گرتن، مە مفا ژ ئەزموونا پێشتر وەرگرتیە، مە ژ بەری 2003 کار د وی بواری دا کریە.
دوو: ل 2020 مە لژنا بەرهەنگاربوونا گەندەلییێ ب فەرمانا دیوانێ یا ژمارە 29 یا سالا 2020 پێکئینا، بۆ بەرسڤا خواستێن گەلی و لژنێ ب رەسمی کار کریە، ل گۆرەی بڕیارا دادگەهێ، چ کەس بیی بڕیارا دادوەری نە هاتیە دەستەسەرکرن، لژنە گەلەک یا سەرکەفتی بوو لسەر نەهێلانا گەندەڵییێ د سازییان دا.
سێ: لژنە بەردەوام ل بن چاڤدێرییا سازییێن چاڤدێرییێ یێن تایبەتمەندبوو، داخوازکەرێ گشتیی ل 2021 ڕاپۆرتەکا هویر دەربارەی لژنێ بەلاڤکریە و ڕاگەهاندیە، ئەم یێن پێگیربووین ب هەمی رێکارێن مافێ مرۆڤی و دەستوورێ عیراقێ، نوکەژی دەنگویێ پێشێلکارییێ بەلاڤکرییە، پێدڤییە بەلگەیێن یاسایی و باوەر پێکری هەبن.
چار: باس ل پێشێلکارییا دارایی دهێتە کرن، ل دەمێ ئەز سەرۆوەزیر، مە ب رەسمی راگەهاندبوو، مە لژنەیەک پێکئینایە، مە بەڵگە و دەلیل داینە دادگەها تایبەتمەند، هیڤی خوازین بەردەوامی ب ڤەکۆلینێ لسەر وان دوسەیان بهێتە کرن تا دوماهییێ و راستی بۆ ڕایا گشتی بهێتە دیارکرن، هەمی ئەو ناسنامێن هاتینە برن، بهێنە زڤراندن بۆ جهێ خۆ یێ یاسایی.
پێنج: دەربارەی بلندییا بهایێ دۆلاری، مە دوپاتی لسەر پێدڤییا ئەگەرێن دناڤبەرا کەرتێ گشتی و کەرتێ تایبەت دا کریە، ئەم گوتارێن میللیگەرایی و موزایدان رەتدکەین، کو پێزانین تێدا نینن و بتنێ ئاریشان ئاڵۆزتر دکەن.
ل دوماهییا رۆهنکرنا خۆ، مستەفا کازمی، نڤیسیە: ” ل دوماهییێ داخواز دکەین حکومەتا نوکە ئەرک و بەرپرسیارەتییا خۆ برێڤە ببەت و هەمی رێکخراو و پێدڤییە سازییێن بوارێ مافێ مرۆڤی ژی جاڤدێرییێ لسەر هەر پێشێلکارییەکا گریمانکری بکەن، پێشوازییێ ژی ل پرۆژێ دیارکرنا ڕاستییان و نەهێلانا ڤەشارتنێ ل هەمی دۆسەیان دکەین.
