فارس عیسا، سەرۆکێ نوونەراتییا حکومەتا هەرێما کوردستانێ ل بەغدا ب سەرەدانەکێ گەهشتە زانکۆیا زاخۆ.
زانکۆیا زاخۆ ڕاگەهاند، ئەڤرۆ چارشەمبی فارس عیسا، سەرۆکێ نوونەراتییا حکومەتا هەرێما کوردستانێ ب سەرەدانەکێ گەهشتە زانکۆیا زاخۆ و ژلایێ سەرۆکێ زانکۆیێ د. ناظم سليمان عبدالعزيز، ڤە هاتە پێشوازیکرن.
زانکۆیا زاخۆ ئاماژە کریە، ئەڤ سەرەدانە ب مەرەما زێدەتر نێزیکبوون و هایداربوون ل ڕەوشا زانکۆیێ و قوتابییان و خواندنێ ل زانکۆیا زاخۆ بوویە.
دیار کریە ژی، د ڕۆینشتنەکێ دا چەندین بابەتێن گرنگ دەربارەی خواندنا بلند هاتنە باسکرن، هەروەسا باس ل ئەوان ئاستەنگێن دکەڤنە ڕێکا قوتابیێن زانکۆیا زاخۆ دا ل دەمێ بەردەوامیدان ب خواندنا بلند ژ دەرڤەی هەرێما کوردستانێ ب تایبەت ل وەڵاتێ تورکیا، کو هندەک زانکۆ ل ئەوی وەڵاتی دانپێدانانێ ب زانکۆیا زاخۆ ناکەن و ئەڤ چەندە ژلایێ د. کاروان ڤە هاتە پێشنیارکرن.
فارس عیسا، سەرۆکێ نوونەراتییا حکومەتا هەرێما کوردستانێ د بەرسڤێ دا ڕاگەهاند، دێ هەمی شیانێن خۆ مەزێخین بۆ هندێ چارەسەریێ بۆ ئەڤێ ئاریشەیێ ببینن دا کو قوتابییێن زانکۆیا زاخۆ بشێن بەردەوامیێ بدەنە خواندنا خۆ ل زانکۆیێن دەرڤەی وەلاتی.
