ئەڤرۆ ئێکشەمبی، من سەرپەرشتییا كۆمبوونا 100 ێ یا جڤاتا وەزیرێن هەرێما کوردستانێ کر
د بڕگا ئێكی یا وێ کۆمبوونێ دا، ئەنجامێن پشتی سەرهدانا شاندێ بلند یێ حکومەتا هەرێما کوردستانێ ب سەرۆکاتییا سەرۆک وەزیران بۆ بەغدا و کۆمبوون ل گەل سەرۆک وەزیرێن فیدرالی و شاندێ دانوستاندنێ حکومەتا فیدرالی ل 2023/1/11 هاته بهحس كرن.
من ئاماژە ب هندێ دا د کۆمبوونێن مه دا ل بەغدا، مه هەست ب هندێ كر كو سهقایهكێ ئەرێنی و دەرفەتهكا باش هەیە بۆ چارەسەرکرنا ئاریشان ل گەل حکومەتا فیدرالی ل سەر بنەمایێ دەستووری و د چارچۆڤێ رێککەفتنناما لایەنێن سیاسی بۆ پێکئینانا حکومەتێ و کارناما وەزاری یا هاتییه پەسەندکرن ژ لایێ جڤاتا نوونەرێن عیراقێ ڤە.
هەروەسا مه تهكهزی ل هندێ كرییه” كو ل سەر چەندین بابەتێن پەیوەندیدار، ژ وان ژی پڕۆژە یاسایا بودجەیێ فیدرالی بۆ سالا 2023 ێ، پڕۆژە یاسایا نەفت و گازا فیدرالی، ماف و شایستێن دەستووری یێن پێشمەرگەیی، بجهئینانا مادێ 140 یێ دەستووری و ئاساییکرنا رهوشا دهڤهرێن کوردستانی یێن دەرڤهیی ئیدارا هەرێمێ، بجهئینانا ڕێککەفتنناما شنگالێ و دەرخستنا میلیشیاتان و هێزێن چەکداری یێن نه یاسایی و چەندین بابەتێن دیتر، مه گوتۆبێژ كرینه و گەهشتینە چەندێن لێک تێگەهشتنێن دهستپێكی بۆ چارەسەرکرنا ئاریشان.
بڕگا دووێ یا وێ کۆمبوونێ، یا تایبەت بوو ب دیاركرنا ڕاپۆرتا وەزارەتا سامانێن سروشتی سەبارەت دابینکرنا نەفتا سپی و داوی بەرەف پێشچوونێن ڕێککەفتنا دناڤبهرا وەزارەتا سامانێن سروشتی و وەزارەتا نەفتا فیدرالی ل دهمێ سەرهدانا شاندێ بلند یێ هەرێمێ ل 1/11 بۆ بەغدا سەبارەت بجهئینانا ڕێککەفتنا هنارتنا پشكا نەفتا سپی بۆ هەرێمێ، کو ژلایێ کەمال محەمەد وەزیرێ سامانێن سروشتی ب وەکالەت هاته بهحس كرن.
د بڕگا سێیێ دا، دیندار زێباری ڕێکخەرێ ڕاسپاردێن نێڤدەولهتی ڕاپۆرتهك سەبارەت دووماهی گاڤ و بەرەف پێشچوونێن میکانیزما بجهئینانا پلانا هەرێما کوردستانێ بۆ مافێن مرۆڤی بۆ سالا ئێكێ دیار كرن.
مه دهست خۆشی ل ڕێکخەرێ ڕاسپاردێن نێڤدەولهتی بۆ ئامادەکرنا وێ ڕاپۆرتێ كر، مه پابەندبوونا حکومەتا هەرێما کوردستانێ ژی ب ڕێزگرتن و پاراستنا مافێن مرۆڤی و چەسپاندن و ب هێزکرنا بنەمایێن دیموکراسییێ و گرنگی پێدانا پێكڤه ژیانا ئاشتییانە دناڤبهرا پێکهاتێن جۆدا یێن هەرێما کوردستانێ هەروەک د کارناما کابینا نههێ دا هاتییه، دوپات کرییە.
پشتی دانوستاندنان، جڤاتا وەزیران ب تێکڕایا دەنگان، ئهو ڕاپۆرتە پەسەند کر.
