وه‌زیرێ ئه‌وقاف و كاروبارێن ئایینى یێ هه‌رێما كوردستانێ و وه‌زیرێ لێبورینێ یێ ئیماراتێ به‌حسا پێكڤه‌ژیانا ئایینى ل هه‌رێما كوردستانێ كر

ل سه‌ر گازییا جڤاتا دانایێن موسلمان، وه‌زیرێ ئه‌وقاف و كاروبارێن ئایینى یێ حكومه‌تا هه‌رێما كوردستانێ سه‌ره‌دانا وه‌لاتێ ئیماراتێ كر و د چه‌ند دیداراندا دووپاتى ل بهایێ پێكڤه‌ژیانا ئایینى ل هه‌رێما كوردستانێ كر.

وه‌زیرێ ئه‌وقاف و كاروبارێن ئایینى یێ حكومه‌تا هه‌رێما كوردستانێ پشتیوان سادق ئه‌ڤرۆ ل سه‌ر گازییا جڤاتا دانایێن موسلمان كو باره‌گایێ وێ یێ سه‌ره‌كى ل ئیماراتێیه‌ و ژلایێ شێخێ ئه‌زهه‌ر و پاپایێ ڤاتیكانێڤه‌ دهێته‌ سه‌رپه‌رشتیكرن، پشكدارى د رێوره‌سمێن پێشكێشكرنا خه‌لاتێ ( شێخ زاید ) بۆ برایه‌تى و مرۆڤایه‌تییێدا كر.

ئه‌و خه‌لاته‌ سالانه‌ پێشكێشى چه‌ند كه‌سایه‌تییێن كاریگه‌ر ل سه‌ر ئاستێ تاك، رێكخراو و حكومه‌تان كو كار ل سه‌ر پێكڤه‌ژیان، ب ئێك گه‌هاندن و پێشڤه‌برنا ئاشتى، ته‌بایى و كارێ خێرخوازى دكه‌ن، دهێته‌ كرن.

ل دووڤ راگه‌هاندنه‌كا وه‌زاره‌تا ئه‌وقاف و كاروبارێن ئایینى، ژ چارچووڤێ سه‌ره‌دانا خوه‌ بۆ ئیماراتێ، پشتیوان سادق دگه‌ل هژماره‌كا كه‌سایه‌تیێن ئایینى و نێڤده‌وله‌تى كو دبیاڤێن ته‌بایى و پێكڤه‌ژیانا ئاینیدا كار دكه‌ن ژ وان نیهان بن موباره‌ن ئال نه‌هیان، وه‌زیرێ لێبۆرینێ یێ ئیماراتێ، تۆنى بلێر سه‌رۆك وه‌زیرێن به‌رێ یێ بریتانیا و چه‌ند كه‌سایه‌تییێن دییێن نێڤده‌وله‌تى كۆمبوو. و د وان دیداراندا ب گرنگیڤه‌ ره‌وشا ئایینى و پێكڤه‌ژیانێ ل هه‌رێما كوردستانێ هاته‌ گوتوبێژكرن.