ئه‌ڤرۆ چارشەمبی 15ی شواتا 2023 ێ” ل سەلاحەدین سەرۆک مەسعود بارزانی ل گەل سەرکرداتییا هەردو ڕێکخراوێن ئێكه‌تییا قۆتابییان و ئێكه‌تییا لاوێن دیموکراتا کوردستانێ کۆمبوو.
ل ده‌ستپێكا وێ کۆمبوونێ کورتییەک ده‌ربارەیی کار و چالاکییان و ئامادەکارییان بۆ بەستنا کۆنگرێ هەردو ڕێکخراوان هاته پێشکێش کرن و پاشی سەرۆک بارزانی په‌یڤه‌ك پێشکێش کر.
سەرۆک بارزانی ب هه‌لكه‌فتا نێزیکبوونا 18 شواتێ و حەفتێ سالییا دامەزراندنا هەردو ڕێکخراوێن ئێكه‌تییا قۆتابییان و ئێكه‌تییا لاوێن دیموکراتا کوردستانێ پیرۆزباهی ل لاوان و قۆتابی یێن خۆشتڤی کر و هیڤییا بەردەوامی و سەرکەفتنێ بۆ خواستن.
زێده‌باری ئاماژەدان ب گرنگییا ڕۆلێ قۆتابییان و لاوان بۆ پێگەهاندنا کادران بۆ بەردەوامییا خەباتا سیاسی و حزبی داخواز کر کو هەردو ڕێکخراو ب پلانه‌كا ڕوون بۆ داهاتی و ب ڕۆحه‌كا هەڤالینی و نیشتمانپەروەرانە و ژ پێناڤی هاریكارییا پڕۆسا پەروەردێ و پێگەهاندنا لاوان و قۆتابییان کۆنگرێ خۆ ببەستن.
سەرۆک بارزانی ئاماژه ب ڕاسپاردە و دەرئەنجامێن کۆنگرێ چاردێ یێ پارتی دا و ته‌كه‌ز كر” دڤێت پارتی بۆ وان ئارمانج و پڕەنسیپان ڤه‌گه‌ریت” یێن كو ژ پێناڤێ وان هاتییه دامەزراندن.
سەرۆک بارزانی هه‌ڤبەشییا خۆ بۆ خەم و ئازارێن زیان ڤێکەفتی یێن ئه‌ردهه‌ژا حه‌فتییا بوری ل باکوور و ڕۆژئاڤایێ کوردستانێ و تورکیا و سووریا دوپاتکر و پێزانینێن خۆ بۆ هاریکاری یێن حکومەتا هەرێمێ و دەزگەهێ خێرخوازییێ بارزانی و هه‌موو خەڵکێ کوردستانێ بۆ زیان ڤێکەفتی یێن وێ ئه‌ردهه‌ژێ هەبوو.
