بهایێ نه‌فتێ داكه‌ڤت

بهایێ نه‌فتێ ژبه‌ر ترسا سه‌رهلدانا قه‌یرانه‌كا نوو یا دارایى و ئیفلاسبوونا بانكا سیلیكۆن ڤالییێ، چار دۆلاران داكه‌ڤت.

ل ئێڤارییا ئه‌ڤرۆ 13-3-2023ێ بهایێ نه‌فتا برێنت سێ دۆلار و 51 سه‌نتان ئانكو ب رێژه‌یا 4.24%ێ داكه‌ڤت، و هه‌ر به‌رمیله‌ك ب 79 دۆلار و 27 سه‌نتان مامه‌له‌ پێ هاته ‌كرن، بهایێ نه‌فتا رۆژئاڤایێ تێكساس ژى سێ دۆلار و 66 سه‌نتان ئانكو ب رێژه‌یا 4.77%ێ داكه‌ڤت و هه‌ر به‌رمیله‌ك ب 73 دۆلار و دوو سه‌نتان مامه‌له‌ پێ هاته‌ كرن.

بهایێ نه‌فتا برێنت بۆ نزمترین ئاست ژ ده‌ستپێكا هه‌یڤا كانوونا دووێ یا ئه‌ڤساله‌، و بهایێ نه‌فتا رۆژئاڤایێ تێكساس ژى بۆ نزمترین ئاست پشتى كانوونا ئێكێ یا سالا 2022ێ داكه‌ڤت.

داكه‌ڤتنا به‌رچاڤ یا بهایێ نه‌فتێ په‌یوه‌ندى ب مه‌ترسییا ئیفلاسبوونا بانكا سیلیكۆن ڤالى یا ئه‌مریكیڤه‌ هه‌یه‌، كو ب SVB یا به‌رنیاسه‌ و راگه‌هاند، پاره‌یێ كاش نه‌مایه‌ و ئێدى نه‌شێن ل سه‌ر كارێ خوه‌ دبه‌رده‌وامبن و به‌رپرسێن ئه‌مریكا كارێن بانكێ راگرتن.