دۆناڵد ترەمپ، سەرۆکێ پێشتر یێ ئەمریکا دبێژیت، چاڤەڕێکریە ل ڕۆژا سێشەمبی بهێتە دەستەسەرکرن و داخواز ژ لایەنگرێن خۆ دکەت کو خۆ پێشاندانێن بەرفرەهــ ئەنجامبدەن.
دادگەها نیویۆرک ڤەکۆلینێ لسەر دۆسەیەکا تڕەمپی و دوو ژنان دکەت، کو دهێتە گۆتن، تڕەمپی بەرتیل داینە ئەوان ژنا دا کو پەیوەندییێن سێکسی یێن دناڤبەرا ئەوان دا دیار نەکەن و تڕەمپی ژ هەتکبەریێ بپارێزن.
ئەڤرۆ شەمبی، 18 ئادارا 2023، تڕەمپی ل تورێن خۆ یێن جڤاکی د بەلاڤکرنەکێ دا باسکریە، چاڤەڕێ دهێتە کرن کو ئەو بهێتە دەستەسەرکرن ل دەمەکی دایە کو داخوازکەرێ گشتی یێ دەڤەرا مانهاتن چاڤەرێیە ب فەرمی هندەک تومەتان ئاراستەی تڕەمپی بکەت، ئەگەر ئەڤە بهێتە کرن، تڕەمپ دێ بیتە سەرۆکێ ئێکێ یی پیشتر یێ ئەمریکا کو هاتبیتە تۆمەتبارکرن.
تڕەمپی د بەلاڤکرنا خۆ دا نڤیسیە: “زانیارییێن نە یاسای یێن هاتینە دزین” ل نڤیسینگەها ئەلڤن براگ، داخوازکەرێ گشتی بەرچاڤ دکەن کو “بەربژارێ هەرە دیار یێ کۆمارییان و سەرۆکێ پێشتر یێ ئەمریکا، ل رۆژا سێشەمبی دێ هێتە دەستەسەرکرن.”
ئەگەر بڕیارا تۆمەتبارکرنا ترەمپی هاتەدان، ل وی دەمی ب تنێ ژ ئەگەرێ خۆ ب دەستڤە بەرنەدانێ دێ هێتە دەستەسەرکرن، بەلێ پارێزەرێن تڕەمپی پێشتر گۆتیە:”سەرۆکێ پێشتر یێ ئەمریکا ل گۆرەی ڕێکارێن ئاسای پێنگاڤان د هاڤێژیت، ب ڕامانا هندێ کو دێ ڕازی بیت خۆ ب دەتە دەستێ پۆلیسێن نیویۆرک یان ژی نڤیسینگەها داخوازکارێ گشتی یێ مانهاتن.”
بەلێ تا نوکە چ بەڵگەیەک نینە کو داخوازکارێ گشتی ب فەرمی پەیوەندی ب تڕەمپی کربیت ژ بۆ کو ئاگەهدارییا دەستەسەرکرنێ بدەتێ، پەیڤدارێ تڕەمپی ڕۆژا شەمبی ڕاگەهاند، چ ئاگەهداریەکا ب وی ڕەنگی بۆ وان نە هاتیە ئاراستەکرن.
