لەیلا عەبدولجەبار: ھندەک ھێزێن سییاسی سڤکاتییێ ب خەلکێ بەھدینان دکەن

ئاژانسا خانی ” تایبەت:

پەرلەمانتارەکا کوردستانێ داخویانی یێن ھندەک دەزگەھێن راگەھاندنێ و لایەنێن سیاسی لدۆر دەڤەرا بەھدینان ب سڤکاتی دزانیت بۆ سەر خەلکێ دەڤەرێ و دبێژیت، ھندەک ھێزێن سییاسی دخوازن سڤکاتییێ ب دەڤەرا بەھدینان بکەن بۆ مەرەمێن خۆ یێن سیاسی.

لەیلا عەبدولجەبار، پەرلەمانتارا پارتی ل پەرلەمانێ کوردستانێ بۆ ئاژانسا خانی دیار کر” دەڤەرا بەھدینان دەڤەرا ژینگەهـ دۆست و مرۆڤ دۆست و جھێ ژیانێیە، بەلێ ھندەک دەزگەھێن راگەھاندنێ و حزبێن سییاسی دخوازن ب خرابی به‌حسێ وێ جوانییا بەھدینان بكەن، ئه‌و دۆسییەکا سیاسی د گوھۆرن بۆ لێدانا دەڤەرا بەھدینان و سڤکاتییێ ب سەدان ھزار کەسێن بەھدینان دکەن، ئەڤە ژی بۆ ئیفلاسا سیاسی ڤەدگەڕیتن یا خۆیایە سڤکاتیکرن ب بەھدینان بۆ داکەفتنا ئاستێ جەماوەرێ وان حزبێن سییاسی و دەزگەھێن راگەھاندنێ ڤەدگەڕیت.

ناڤهاتییێ گۆت ژی” ل سنورێ پارێزگەھا دھۆکێ و دەڤەرا بەھدینان کاکلا کوردایەتی و مەردایەتیێ یە، خەلکێ دەڤەرێ وان سڤکاتییا ژبیر ناکەت، چونکی چەند کەسێن گومان ل سەرن ھاتینە سزادانان و دھێنە بکارئینان بۆ شكاندنا خەلکێ دەڤەرێ.