مامۆستایەکێ زانکۆیێ: ئیران و هەڤپەیمانێن وێ ناهێلن رێککەفتنا شنگالێ بهێتە بجهئینان

ئاژانسا خانی ، زنار:

د. نەوزاد هێتۆتی، مامۆستایێ زانستێن سیاسی ل زانکۆیا سەلاحەدین، ل هەولێرێ، بۆ ئاژانسا خانی دیار کر: رێككەفتنا شنگالێ، ل سالا 2020 ێ، دناڤبەرا حكومەتا عیراقێ و حکومەتا ھەرێما كوردستانێ بۆ ئاساییکرنا رەوشا شنگالێ هاتییە ئیمزا كرن، ھەروەسا د رێككەفتنا ئیدارا دەولەتێ دا،  بۆ پێكئینانا حكومەتا سوودانی تەکەزی، ل سەر وێ خالێ هاتییە كرن” کو دڤێت رەوشا شنگالێ بهێتە ئاساییکرن و گرۆپێن میلیشیاتان ل وێ ده‌ڤەرێ نەمینن.

 وی مامۆستایێ زانکۆیێ گۆت ژی: بەلێ ئیران و ھەڤپەیمانێن وێ چ جاران رێکێ نادەن ئەو خالە بهێته بجهئینان و خۆ ژ وێ دەڤەرێ ڤەناكێشن، هه‌روه‌سا د دیارترین پێنگاڤ دا و لدووڤ هندەک ژێدەران حەشدا شەعبی مژوولی دروستكرنا لیوایەكا دیتر یا حەشدێیە ل شنگالێ بۆ هندێ ل وێ دەڤەرێ بەلاڤ ببن، دیسان فالح فه‌یاز، سه‌رۆكێ وێ ده‌سته‌یێ” رازیبوونا محه‌مه‌د شیاع سوودانی‌، سه‌رۆكوه‌زیرێن عێراقێ ب ده‌ستڤە ئینایه‌ بۆ پێكئینانا هێزەکا نوو یا حه‌شدێ ل قه‌زا شنگالێ كو ئەو ژی لیوایەکا حەشدێیە.

ناڤهاتی ئاشکرا کر ژی: مەرەما ھەرە سەرەكی ژ  دروستکرنا وێ لیوایا حەشدێ بۆ پتر ب ھێزكرنا پێگەهێ گرۆپێن چەكدارییە ل وێ دەڤەرێ و پێشێلكرنا رێككەفتنا دناڤبەرا ھەرێمێ و بەغدا دایە، له‌وما پێدڤییە ھەرێم دژاتییا وان لڤینان بکەت.