رێڤه‌به‌رییا گشتییا پۆلیسێن هه‌رێمێ : به‌هرا پتر یا وان كه‌سێن ب ئۆنلاین چه‌كى د فرۆشن هاتینه‌ ده‌سته‌سه‌ركرن

په‌یڤدارێ رێڤه‌به‌رییا گشتییا پۆلیسێن هه‌رێمێ راگه‌هاند، هه‌موو ئه‌و جهێن مامه‌له‌یا كرین و فرۆتنا چه‌كى دكرین هاتینه‌ داخستن و ب تنێ چه‌ند كه‌س هه‌بوون كو بزاڤ دكرن ب ئۆنلاین چه‌كى ب فرۆشن، لێ به‌هرا پتر یا وان ژى هاتینه‌ ده‌سته‌سه‌ركرن.

كارزان ئه‌میر په‌یڤدارێ رێڤه‌به‌رییا گشتییا پۆلیسێن هه‌رێما كوردستانێ د پرێسكۆنفرانسه‌كیدا راگه‌هاند، رێكارێن قانوونى ژلایێ هێزێن ئاسایشا ناڤخۆڤه‌ بۆ ده‌ست بسه‌رداگرتنا چه‌كێ بێ موله‌ت و نه‌قانوونى ل سه‌رانسه‌رى هه‌رێما كوردستانێ هاتینه‌ بكارئینان، وه‌لاتییان ئاگه‌هدار دكه‌ن، كو ئه‌وێن چه‌كێ بێ موله‌ت هه‌ى و تۆمارنه‌كری، كێمتر ژ 80 رۆژان ل پێشییا وانه‌ بۆ هندێ چه‌كێ خوه‌ تۆمار بكه‌ن و خۆ ژ جزادان و ده‌سته‌سه‌ركرنێ دووربكه‌ن.

كارزان ئه‌میرى دیار ژى كر، ئه‌و كه‌سێ چه‌كێ خوه‌ تۆمار دكه‌ت، دڤێت ل جهه‌كێ پاراستى یێ مالا خوه‌ ب هه‌لگریت و نابیت ب فرۆشیت یان وه‌ك دیارى پێشكێشى كه‌سه‌كێ دى بكه‌ت، پشتى ب دووماهى هاتنا ده‌مێ قانوونى بۆ تۆماركرنا چه‌كى كو دێ ل 21-7-2023ێ ب دووماهى هێت، وه‌زاره‌تا ناڤخۆ دێ هه‌شت لژنه‌یان ل پارێزگه‌هـ و ئیداره‌یێن سه‌ربه‌خۆ یێن هه‌رێما كوردستانێ ب مه‌ره‌ما هه‌لسه‌نگاندنا پێدڤى بۆ خۆدان چه‌كان پێكئینیت.