پارتى و ئێكه‌تییێ راگه‌هاندنه‌كا هه‌ڤپشك به‌لاڤكر

شاندێن پارتى دیموكراتى كوردستان و ئێكه‌تی نیشتیمانى كوردستان ل باره‌گایێ مه‌كته‌با سیاسییا ئێكه‌تییێ ل سلێمانییێ كۆمبوون، پشتى كۆمبوونێ ژى راگه‌هاندنه‌كا هه‌ڤپشك به‌لاڤكر.

دراگه‌هاندنێدا هاتییه‌، هه‌ردوو لایان زێده‌بارى بلند نرخاندنا ده‌ستپێشخه‌رییا سه‌رۆك بارزانى ل ده‌مێ پێدڤى، هه‌ردوو لا دهه‌ڤرابوون كو پێكڤه‌ دگه‌ل لایه‌نێن دى پێنگاڤێن كردارى بۆ پێشڤه‌چوونا وێ ده‌ستپێشخه‌رییێ پاڤێن و ناڤمالا كوردستانێ رێكبێخن و لاپه‌ره‌كێ نوو ڤه‌كه‌ن.

د پشكه‌كا دییا راگه‌هاندنێدا ئاماژه‌ ب هندێ هاته‌ كرن، هه‌ردوو مه‌كته‌بێن سیاسی یێن پارتى و ئێكه‌تییێ ده‌ستخۆشى ل جڤاتا وه‌زیرێن حكومه‌تا هه‌رێما كوردستانێ كر، بۆ په‌سه‌ندكرنا پرۆژه‌یێ رێكخستنا دارایى كو به‌هرا پترا لایه‌نێن پێكهێنه‌رێن كابینه‌یا نه‌هێ و هه‌ردوو مه‌كته‌بێن سیاسى پشته‌ڤانییه‌كا تمام ل وى پرۆژه‌ى دكه‌ن.

پارتى و ئێكه‌تییێ دراگه‌هاندنا هه‌ڤپشكدا دبێژن، هه‌ردوو لایان بریاردا وه‌كو ئێك تیم كاربكه‌ن و زنجیره‌یه‌كا كۆمبوونێن دیژى بۆ خۆشكرنا سه‌قایێ ئابوورى و سیاسى بۆ كرنا هه‌لبژارتنان و رووبرووبوونا ئه‌وان هه‌ڤركییێن ل ده‌ڤه‌رێ هه‌ین بكه‌ن.