شاندەکێ وەزارەتا سامانێن سروشتی یێ حکومەتا هەرێما کوردستانێ ب سەرەدانەکێ گەهشتە بەغدا

شاندەکێ وەزارەتا سامانێن سروشتی یا حکومەتا هەرێما کوردستانێ ب سەرەدانەکێ گەهشتە بەغدا و دگەل سەرۆکێ جڤاتا بلند یا دادوەری و وەزیرێ پەترۆلا فیدڕالی کۆمبوو.

وەزارەتا سامانێن سروشتیی د ڕاگەهاندنەکێدا بەلاڤکریە، ئەڤرۆ دووشەمبی 29 گۆلانا 2023، شاندەکێ وەزارەتا سامانێن سروشتی ب سەرۆکایەتییا کەمال محەمەد ساڵح، وەزیرێ سامانێن سروشتی ب وەکالەت سەردانا بەغدا کر و ب جودا دگەل هەر ئێک ژ فایەق زێدان سەرۆکێ جڤاتا بلند یا دادوەری و حەیان عەبدولغەنی وەزیرێ پەترۆلا فیدڕاڵی کۆمبوون.

ئاماژە کریە، هەردوو لا دەربارەی ب دوماهیئینان و ئێکلاکرنا ئەوان دۆسەیێن هەردوو لایان ل دەمێ بووری ل دژی ئێک تومارکرین گۆتوبێژکرن و هەردوو لایان ئامادەییا خۆ بۆ پێکڤە کارکرن و چارەسەرکرنا ئەڤان دۆسەیان دیارکر.

دیارکریە ژی، د دیدارا شاندێ وەزارەتا سامانێن سروشتی دگەل وەزارەتا پەترۆلا فیدڕالی دا باس ل باشترکرنا هاریکارییێن دناڤبەرا هەردوو لایاندا هاتە کرن.

دەربارەی دەستپێکرنا هنارتنا پەترۆلا هەرێمێ ژی، وەزارەتا سامانێن سروشتی ئاشکرا کریە،”ڕێکار تمام بووینە و هەولێر و بەغدا ئامادەبوونا خۆ بۆ زۆۆتر دەستپێکرنا هنارتنا پەترۆلێ دیارکریە.”