کارگەھەکا چێکرنا تڕۆمبێلان دێ ل هه‌رێمێ ھێتە دامەزراندن

ئاژانسا خانی ” تایبەت:

سەرۆکێ دەستەیا گشتییا وەبەرھێنانێ ئاشکرا کر، ل گەل ھژمارەک کۆمپانی یێن ئەلمانی دانوستاندن دھێنە کرن بۆ ڤەکرن و دامەزراندنا کۆمپانییەکا بەرھەمئینانا ترۆمبێلان و سەرۆکێ حكومەتێ ژی پشتەڤانییێ ئەڤی بابەتی دکەن.

د. محەمەد شوکری، سەرۆکێ دەستەیا گشتییا وەبەرھێنانی بۆ ئاژانسا خانی دیارکر” دانوستاندن ل گەل ھژمارەکا کۆمپانییێن ئەلمانی دھێنە کرن ب مەرەما دامەزراندنا کۆمپانیەکا بەرھەمئینانا تڕۆمبێلان ل ھەرێما کوردستانێ، دەستەیا وەبەرھێنانێ گرنگییەکا زۆر ب دامەزراندنا کارگەھەکا ب ڤی ره‌نگی ددەت و سەرۆکێ حوکمەتا ھەرێما کوردستانێ پشتەڤانییێ ل ئەڤی بابەتی دکەت.

ناڤهاتی گۆت ژی” کۆمپانییێن ئەلمانی دخوازن کارگەھەک بۆ پێکڤە گرێدانا تڕۆمبێلان بھێتە ڤەکرن ل ھەرێما کوردستانێ و ھەرێم  ببیتە سەنتەرەک کو تڕۆمبێل لێ بھێنە بەرھەمئینان و ھنارتن بۆ بازاڕی، ئەو تڕۆمبێلێن ل ھەرێما کوردستانێ دھێنە بەرھەمئینان دێ پارچێن وان ل ئەلمانیا ھێنە ڤەگوھاستن بۆ ھەرێمێ كو ببنە تڕۆمبێلێن ئەلمانی.