وه‌زاره‌تا ناڤخۆ : نابیت چ ته‌كسى بێى لۆگۆ كاربكه‌ن

وه‌زاره‌تا ناڤخۆ یا حكومه‌تا هه‌رێما كوردستانێ شۆفێرێن ته‌كسییان ئاگه‌هدار دكه‌ت، پشتى 15ى ته‌مموزێ هه‌ر ته‌كسییه‌كا بێى لۆگۆ كاربكه‌ت، دێ ژلایێ پۆلیسێن هاتنوچوونێڤه‌ سزایێن دارایى بۆ هێنه‌ نڤێسین.

پشتى وه‌زاره‌تا ناڤخۆ ب فه‌رمانا وه‌زارییا ژماره‌ ( 3018/ ك ) ل ( 25ى كانوونا دووێیا 2023ێ ) ئاسانكارى كرین داكو ئه‌و كارمه‌ندێن كه‌رتێ گشتى ( مه‌ده‌نى و سه‌ربازى ) كو مووچه‌یێن وان ژ ئێك ملیۆن دیناران كێمتره‌ بشێن ب شێوه‌یێ قانوونى پشتى ده‌وامێ شۆفێرییا ته‌كسییێ بكه‌ن و ببنه‌ خۆدان لۆگۆیێ ته‌كسییێ، حه‌فت هه‌یڤان ده‌رفه‌ت دایێ كو ته‌كسییێن خوه‌ لۆگۆ بكه‌ن، ل دووڤ رێنمایان لۆگۆیان گرێبده‌ن و دووماهى ژڤان 15ى ته‌مموزا 2023ێیه‌.

ل دووڤ رێنمایێن وه‌زاره‌تا ناڤخۆ، دڤێت هه‌موو ته‌كسییێن باژێر و باژێركێن هه‌رێما كوردستانێ هه‌تا 15ى ڤێ هه‌یڤێ مامه‌له‌یێن لۆگۆیێن ته‌كسییێن خوه‌ تمامكربن و لۆگۆ ل ته‌كسییێن خوه‌ دابن، هه‌روه‌سا كارتا زانیارییان دناڤ ته‌كسییێن واندا ل دووڤ رێنمایێن تایبه‌ت كو دێ ژلایێ رێڤه‌به‌رییا ڤه‌گۆهاستنێڤه‌ بۆ هێنه‌ درووستكرن، هاتبنه‌ گرێدا.

وه‌زاره‌تا ناڤخۆ راگه‌هاند ژى، ژ 16ى ڤێ هه‌یڤێ ده‌ستهه‌لات دێ ب ئه‌فسه‌رێن پۆلیسێن هاتنوچوونێ هێته‌دان، ل ده‌مێ دیتنا ته‌كسییێن بێ لۆگۆ ئێكسه‌ر سزایێن دارایى كو 40 هزار دینارن بۆ بنڤێسن و ب سیسته‌مى بۆ شۆفێرى بهێنه‌ هنارتن.