د. نه‌هله‌ قادر: عێراق دێ پێنج هزار دەرچوویێن زانکۆیان بۆ خواندنێ هنێریتە دەرڤه‌یی وه‌لاتی

ئاژانسا خانی:

حکومەتا عێراقێ دێ پێنج هزار قوتابییان ب مه‌ره‌ما خواندنا ماستەر و دکتۆرایێ هنێریتە زانکۆیێن دەرڤە و هه‌یاما هه‌یڤه‌كێ دیار كرییە بۆ پێشکێشکرنا داخوازییان و ئەڤ دەلیڤە بۆ دەرچوویێن زانکۆیێن هەرێما کوردستانێ ژییه‌.

د. نەهلە قادر، ئەنداما لژنا خواندنا بلند ل پەرلەمانێ عێراقێ” بۆ ئاژانسا خانی دیار كر: ئه‌ڤ بابه‌ته‌ لدووڤ ده‌ستپێشخه‌رییا محمه‌د شیاع سوودانی” سه‌رۆك وه‌زیرێن عیراقێ بوویه‌ و هنارتنا وان پێنج هزار قوتابییان دێ‌ بۆ ده‌مێ چار سالان بیت” هه‌ر سال دێ هزار و 200 قوتابی چنه‌ ده‌رڤه‌یی وه‌لاتی خوینن و خواندن ژی” دێ لدووڤ پێڤه‌رێن نمران و ئاستێ زمانی و ناسناڤێ زانستی بیت و ئه‌ڤ ساله‌ نێزیكی 700 قوتابی دشێن بچنه‌ ده‌رڤه‌یی وه‌لاتی بخوینن” ژبه‌ركو بودجه‌یێ عیراقێ زوو نه‌هاته‌ په‌سه‌ند كرن و دیسان خواندن ژی دێ ل وان زانكۆیا ن بیت” یێن كو پله‌ به‌ندیا وان یا بلند بیت و ئه‌ڤ چه‌نده‌ لبه‌رچاڤ هاتییه‌ وه‌رگرتن و هه‌روه‌سا خواندن ژی دێ لدووڤ تایبه‌تمه‌ندییێ بیت و سالانه‌ قوتابی دێ لدووڤ تایبه‌تمه‌ندییا خواندنێ ل عیراقێ هێنه‌ ڤرێكرن” داكو ل ده‌رڤه‌یی وه‌لاتی بخوینن.

هه‌روه‌سا نڤێسینگەها رۆژنامەڤانی یا سەرۆک وەزیرێن عێراقێ ئاشکرا کر، لژنا بلندا پێشخستنا خواندنێ یا سەر ب نڤێسنگه‌ها ویڤه‌” دەست ب رێكاران كرییه‌، بۆ هنارتنا پێنج هزار قوتابییان بۆ زانکۆیێن دەرڤه‌یی وه‌لاتی ب مه‌ره‌ما خواندنا ماستەر و دکتۆرایێ و ل 15 ی ته‌باخێ هه‌تا 15 ی ئیلۆنا 2023 ێ، دەرگه‌هێ پێشکێشکرنێ دێ یێ ڤه‌كری بیت و مەرج ژی دێ ب رێیا سایتێ فەرمی یێ خواندنا بلندا پێشخستنا خواندنێ (hced.ur.gov.iq) هێنه‌ به‌لاڤكرن.

ناڤهاتییێ گۆت ژی: ئەو دەستپێشخەرییە بۆ هنارتنا قوتابییان بۆ دەرڤه‌یى عێراقێ ل هه‌یڤا گولانا بوری هاتبوو راگەهاندن، پشتی په‌سه‌ندكرنا بودجه‌یی كه‌فته‌ کار و دەرچوویێن زانکۆیێن باوەڕپێکری یێن هەرێما کوردستانێ ب تایبەتی یێن حکومی دشێن داخوازی یێن خۆ پێشکێش بکەن بۆ هندێ ب مه‌ره‌ما خواندنا ماستەر و دکتۆرایێ بچنە دەرڤه‌یى وه‌لاتی و هنارتنا دەرچوویێن زانکۆیان بۆ خواندنێ بۆ زانکۆیێن دەرڤەیی وه‌لاتی دێ ل سەر خەرجییێن حکومەتا عێراقێ‌ و چەند رێکخراوێن نێڤدەولەتى بیت.