سەرۆکێ هەرێما کوردستانێ و سەرۆکوەزیرێن عیراقێ ڕەوشا کەرکووکێ گۆتوبێژ کر

نێچیرڤان بارزانی، سەرۆکێ هەرێما کوردستانێ و محەمەد شیاع سوودانی، سەرۆکوەزیرێن عیراقێ د پەیوەندیەکا تەلەفۆنیدا دوپاتی ل پێدڤیا بجهئینانا ڕێکارێن بلەز  یێن لایەنێن پەیوەندیدار کر بۆ پاراستنا ئارامی و سەقامگیریا کەرکووکێ.

ئەڤشەڤە شەمبی 2 ئەیلولا 2023، ماڵپەڕێ سەرۆکایەتییا هەرێما کوردستانێ، ڕاگەهاندنەک بەلاڤکر و تێدا هاتیە، نێچیرڤان بارزانی، سەرۆکێ هەرێما کوردستانێ ومحەمەد شیاع  سوودانی، سەرۆکوەزیرێن عیراقێ، د پەیوەندیەکا تەلەفۆنیدا ڕەوشا ئەمنی یا باژێرێکەرکووکێ گۆتوبێژکر.

د ڕاگەهاندنێدا ئاماژە کریە، هه‌ردوولا دوپاتی ل پێدڤیا بجهئینانا ڕێکارێن بلەز یێن لایەنێن پەیوەندیدار کریە بۆ پاراستنا ئارامی و سەقامگیریا کەرکووکێ و ڕێگرتن ل هەر بزاڤەکا تێکدانا پێکڤە ژیان و ئاسایشا باژێرێ و وەلاتییان.

دیارکریە ژی، هه‌ردوولا تەکەز کریە کو پێدڤیە لایەنێن ئەمنی یێن باژێری  بێ جوداهی ئارامی و سەقامگیریا هه‌می پێكهاته‌یێن كه‌ركووكێ بپارێزن و ڕێکێ ل ئالۆزی و ئالۆزکرنا زێدەتر یا ڕەوشا ئەمنی یا باژێری بگرن، هەروەسا دووڤچوون و ڤەکۆلینا یاسایی بەرامبەر تەقەکەران بهێتە کرن کو شەهید و بریندار ل دووڤ خۆ ئیناینە.