کۆڤان حسێن
دبیت ژ ئالییەکێ ڤە ڕاست بیت دەولەتێن نەتەوەیی کال ببیت و ئێدی وەلاتێن خەلکی ھزر ل ھندێ دا دکەن وەلاتا ئاڤا بکەن ل سەر ڕەنگێ ئێکەتییا ئەورۆپی و سنور و پارە و ئابوورێ خۆ بۆ خوشگوزەرانییا وەلاتێن خۆ ئارەستە دکەن. ژ خۆ کەسێ ئاریشا ناسنامێ و شنوناسی و شانازێن نەتەوەی نینە. بەلێ وەلاتێن ھەرفتی 100 سالە نە شیاینە بۆ خۆ وەلاتەکێ ڕێزدار ئاڤا کەن نە بۆ یێن دگەل خۆ دژین ژی بیتە جھێ ژیان و ھیڤییان. ئەرێ چ سەدەم بووینە عیراق نەبوویە دەولەتەکا ڕێزدار، ل دەمەکی ھەمی ڕەگەزێن وەرارێ و شیانا مرۆڤا و ئابووری و ھەر پێدڤییەکێ ھەنە. ئەرێ چ گونەھا کوردا بوویە بۆ خاترا ئینگلیز و بەرژەوەندییێن وان ئەم ب ئەڤێ عیراقێدا گرێداین یان ئاشکراتر کێ پرسیارا عەرەبا ژی کریە ھەوە دڤێت کورد وەلاتییێن عیراقا ھەوەبن؟ ژ ڕاستی ئێدی ئەستەمە دەرەجەیەك ھەبیت مرۆڤ بشێت خۆ ڕازی کەتن. کو ئەڤی وەلاتێ پشتی 100 سالا ئاسۆیەك ھەبیت ژیان تێدا ئاسای بیت. وەلاتەك هەتا نوکە لەشکەرەکێ نشتیمانی نینە. پاسپۆرتەك وەك یا بەنی بەشەرا نینە، دینارەکێ موکم و خۆراگر نینە ل سیکێ. هەتا نوکە ھزرا تۆلڤەکرنێ و کوشتنێ و خوینرشتنێ تێدا زالە. 100 سالە توخمەك سیاسییا پەیدانەکریە ل گۆر تێگەھەك سیاسی سیاسەتێ بکەن. هەتا نوکە ھەبوونا ئێك قبول نەکریە، ھەمی شانازییێن لەشکەرێ عیراقێ (حرکات الشمالە) ئانکو کوشتنا کوردا یان وێرانکرنا عیراقێ بخۆیە. کوردا ب ھەر ڕەنگێ ھەی کیانەك ئاڤا کریە ھەر چنەبیت ژ کەلتور و ھزرا وان یا پاراستی بیت. ھەمی ئارمانجا (دەولەتا کیر و موازی) ل عیراقێ ل گۆر گۆتارا وان مەترسییا کوردستانێ یە ل سەر عیراقێ. 100 سالە چ حزبەكا سیاسی وەك ھزر پرۆژەك بۆ پرسا کوردا نەبوویە و چ (دیتن و روئیایەك) نەبوویە. ھەمی گاڤا تەکتیکا وان ئەو بوویە ھندی ئەو لاواز ئارام بن و گاڤا پیچەك بھێزبوون ھەمی ب شیعە و سنە ڤە، ئامادەنە ئەنفالا بکەنەڤە. کورد ھەمی چەپ و ڕاست ئیسلامی و نەتەوەپەرست دچاڤێن وان دا ئێکن. مخابن مەژی سەد سالا نەشیا ڤێ راستییێ بچینین. ھەمی گاڤا گرۆپێن کوردی ھەبوینە و نوکەژی کار دکەن کو عیراقێ بۆ مە چارەسەرییا ئەڤێ ھەیە، سەربۆرا کوردی چەندا خراب بیت ژ یا 100 سالێن عیراقا پری گاز و شیان باشترە.کارەسات ئەوە عێراق نەدەولەتە ججارا بەلکو ھەمی جارێ تاقمەکێ دەستەلات گرتیە دەست و چ پرۆژەك بۆ خۆ نینە ئەما بۆ کوردستانێ ھەر ھزرێ بۆ ناکەن و باشترین کورد ل دەف ھەمی تاقما فەرمون دیرۆكێ بخۆینن ئەوە یێ (جاشاتی) قبولکری و رازی بووی ب ھندەك ئیمتیازاتا. ڕاستی نوکە دەمێ تەحلیلێ نینە دەمێ ھندێ یە ئەم وەك مللەت پێداچوونێ ب خۆ دا بكەین ژ ئالییێ سیاسی ڤە, ئەڤ ھەمی ھاندان و شرینکرنا عیراقێ چەوا ھاتە ناڤ مە و مە پیچەکێ باوەر کر. ئەم سەرەدەرییێ دگەل مافییەکا خۆ فرۆشا عیراقی دکەین ب ناڤێ حەشدێ نوکە و دوھی دگەل ھەمی مافییا بەعس و ژ بەری ھینگێ دگەل عەسکەرتارییا گۆر فەھم و ژبەری ھینگێ دگەل ئولیگاشیا پادشاھییێ و ھەتا دووماھیکێ. سەر ئەنجام ب ھەمی زمان و فەھم و فەلسەفا کوردا قبول ناکەین. باوەر ناکەم تشتەك مابیت ئەم تاقی بکەین. ھەتا جاشاتی ژی مە یا تاقیکری. عیراق دەولەت با بەس ژ ڕاستی دەولەتبادا ڕەوش باشتر بیت. بەس ب ڕاستی و درستی ئەم نەچارین دگەل مافییەکا سیاسی مەزھەبی نەژادپەرست (بەربەری) وەحشیەتگەری بژین. کێ گومان ھەیە ژ ئەڤێ ب فەرموون ڕەوشا کەرکووکێ شلۆڤەکەن، للکلام بقیە..
