نێچیرڤان بارزانی سه‌رۆكێ هه‌رێما كوردستانێ، پێشوازی ل سێرج دیكشن بالیۆزێ به‌لجیكا ل عیراقێ و ئوردنێ كر.
د كۆمبوونێدا دانوستاندن ل دۆر په‌یوه‌ندیێن به‌لجیكا دگه‌ل عیراقێ و هه‌رێما كوردستانێ، په‌یوه‌ندییێن هه‌ولێر و به‌غدا و چاره‌سه‌ركرنا ئاریشێن وان، گرنگییا شیاندنا ره‌ڤاندیێن ئێزدی یێن ژ ده‌ستێن داعشێ رزگاربوویێن، ره‌وشا سیاسییا عیراقێ و هه‌لبژارتنێن عیراقێ وهه‌رێمێ كرن.
نێچیرڤان بارزانی سوپاسییێن هه‌رێما كوردستانێ بۆ پشكداریكرنا به‌لجیكا د هه‌ڤپه‌یمانییا نیڤده‌وله‌تییا دژی داعشێ دا و هاریكاریێن وێ بۆ عیراقێ و هه‌رێما كوردستانێ ده‌ربرین، هه‌روه‌سا هه‌ردوولایان حه‌زا پێشڤه‌برنا په‌یوه‌ندییان و به‌رفره‌هكرنا هاریكاریێن هه‌پشك دناڤبه‌را واندا دووپاتكر.
هه‌ردوو لا ل سه‌ر گرنگییا ب جهئینانا دروست یا سیسته‌مێ فیدرالی ل عیراقێ و كاركرنا پێكڤه بۆ پاراستنا ئارامی و سه‌قامگیرییا عیراقێ د هه‌ڤرابوون ، هه‌روه‌سا بالیۆزێ به‌لجیكا سوپاسییا وه‌لاتێ خۆ بۆ رۆلێ هه‌رێما كوردستانێ د شكاندنا داعش دا به‌رهنگاربوونا تیرورێ ده‌ربری.
د ته‌وه‌ره‌كێ دییێ كۆمبوونێدا دانوستاندن ده‌رباره‌ی دووماهی پێشهاتێن ده‌ڤه‌رێ ب گشتی كر.
