ئاژانسا خانی:
رێڤەبەرێ گشتییێ وەبەرهێنانا دهۆکێ گۆت، ل سەنتەرێ پارێزگه‌ها دهۆکێ نێزیکی 23 پڕۆژێن ئاكنجیبوونێ هەنه” هه‌روه‌سا ل سەر راسپاردا مەسرور بارزانی، سەرۆکێ حکومەتا هەرێما کوردستانێ ئاریشا پڕۆژێ ئاریا ستی هاته چارەسەر کرن.
هەڤال سدیق، زێده‌تر بۆ ئاژانسا خانی دیار كر: ئاریا ستی پڕۆژەكێ گرنگێ ئاكنجیبوونێیه، کو مۆله‌تا وەبەرهێنانێ وەرگرتییه، ل سەنتەرێ پارێزگه‌ها دهۆکێ هاتییه دروستکرن، به‌ری ئه‌و پرۆژه بهێته ته‌مامكرن، هنده‌ك ئاریشه دروستببوون ژلایێ بەلێندەرێ وی پڕۆژەیی، هه‌ر چه‌نده ئه‌و پرۆژه ب كوالێتییه‌كا باش هاتییه چێكرن” كو ئێكه ژ پرۆژێن سه‌ركه‌فتی ل پارێزگه‌ها دهۆكێ” خۆشبەختانە ل سەر راسپاردا مەسرور بارزانی، سەرۆکێ حکومەتا هەرێما کوردستانێ، لژنەک بۆ دووڤچوونا ئاریشێن وی پڕۆژەیی هاتییه پێکئینان، ئاریشا وی پرۆژه‌یی هاتییه چارەسەر کرن، نوكه ئه‌و پڕۆژە د قووناغا تەمامبوونێ دایە، چەندین شوقە ژی رادەستی خودانێن وان هاتینه کرن” د هه‌مان ده‌مدا پارێزگارێ دهۆكێ و ده‌زگه‌هێ خێرخوازییێ بارزانی و لقا ئێك یا پارتی رۆله‌كێ گرنگ د چاره‌سه‌ركرنا ئاریشا ئاریا ستی دا هه‌بوویه.
ناڤهاتی گۆت ژی: د ده‌مه‌كێ نێزیک دا هه‌موو ئاڤاهیێن وی پڕۆژەیی دێ ته‌مام بن” ده‌مێ ته‌مام دبن ژی دێ هه‌موو شوقه بۆ خودانێن وان هێنه راده‌ست كرن” هه‌روه‌سا ل سەنتەرێ پارێزگه‌ها دهۆکێ نێزیکی 23 پڕۆژێن ئاكنجیبوونی هه‌نه، پرانییا وان پرۆژان د قووناغا تەمامبوونێ دانە و رادەستی خودانێن وان هاتینه کرن، پشكه‌ك ژ وان پرۆژان ژی د قووناغا دووماهییێ دانه.
د. هه‌ڤال سدیق دبێژیت ژی: د کابینا نه‌هێ یا حکومەتا هەرێما کوردستانێ مه كۆمه‌كا مۆله‌تێن وەبەرهێنانێ داینە بۆ دروستکرنا پڕۆژێن گەشتیاری ل پارێزگه‌ها دهۆكێ، هه‌روه‌سا پڕۆژێ ئاریا ستی ل دهۆکێ ژ هزار و 200 یه‌كه‌یێن ئاكنجیبوونێ پێکدهێت و ب بڕیارا سەرۆکێ حکومەتا هەرێما کوردستانێ مافێ پشكدارێن وی پڕۆژەیی دێ یێ پاراستی بیت.
