پارێزگارێ حەسەکە دیار كر: رێککەفتنا 29 ی کانوونا دووێ یا 2026 ێ، د ناڤبەرا حکومەتا سووریێ و هێزێن سووریا دیمۆکرات (هەسەدە) دا هەیە، نوکە گاڤێن کریاری بۆ بجهئینانا وێ دەستپێکرینە.
نورەدین ئەحمەد، پارێزگارێ حەسەکە گۆت ژی: ڤێ دووماهییێ چەندین بڕیار بۆ دەستبکاربوونا کەسایەتیێن سەربازی، ئەمنی و کارگێڕی دەرچووینە، هەروەسا هێزێن سووریا دیمۆکرات د چارچووڤێ چار لیوایان دا هاتینە رێکخستن؛ سێ ژ وان د ناڤ فەیلەقەکێ سەر ب وەزارەتا بەرگریا سوورییێ ڤەنە ل پارێزگەها حەسەکە، لیوایەکا دی ژی د ناڤ فەیلەقەکا وەزارەتا بەرگرییێ دایە ل پارێزگەها حەلەب (دەڤەرا کۆبانی).
پارێزگارێ حەسەکە بەحسێ رێکخستنا ئەفسەر و کارمەندێن “ئاسایشێ” دناڤ وەزارەتا ناڤخۆیا سوورییێ دا کر، دەربارەیی پرسا ئاواران ژی، نورەدین ئەحمەد ئاشکرا کر کو هەتا نوکە 600 خێزانێن ئاوارە یێن عەفرینێ ب دو قووناغان ڤەگەڕیاینە، ئەڤ پرۆسە دێ یا بەردەوام بیت هەتا دۆسەیا ئاوارێن عەفرینێ ب تەمامی دهێتە گرتن.