ب پشكداراییا شاندێ حكومه‌تا هه‌رێما كوردستانێ كۆمبوونا چارێ یا لژنا بلندا نیشتیمانییا ئاڤێ هاته‌ كرن

پارێزگه‌ها هه‌ولێرێ ڕاگه‌هاند، ب سه‌رپه‌رشتییا محه‌مه‌د شیاع سوودانی و ب پشكداراییا شاندێ هه‌رێما كوردستانێ، كۆمبوونا چارێ یا لژنا بلندا نیشتیمانییا ئاڤێ هاته‌ كرن.

پارێزگه‌ها هه‌ولێرێ دڕا‌گه‌هاندنه‌كێدا ئاماژه‌ دا، ئه‌ڤرۆ دووشه‌مبی ب پشكدارییا شاندێ حكومه‌تا هه‌رێما كوردستانێ، كو پێكهاتبوون ژ ئومێد خۆشناو پارێزگارێ هه‌ولێرێ ، كه‌ریم سلێمان بریكارێ وه‌زاره‌تا چاندنا حكومه‌تا هه‌ڕیمێ و د. كاروان هه‌ورامی رێڤه‌به‌رێ گشتییێ وه‌زاره‌تا چاندنێ یا حكومه‌تا هه‌ریما كوردستانێ، و ب سه‌رۆكاتییا محمه‌د شیاع سوودانی سه‌رۆكوه‌زیرێ عیراقێ، ل دیوانا سه‌رۆكاتییا جڤاتا وه‌زیرێن عیراقێ، كۆمبوونا چارێ یا لژنا بلند یا نیشتیمانییا ئاڤێ هاته‌ كرن.

د كۆمبوونێدا دانوستاندن ده‌رباره‌ی ره‌وشا ئاڤێ و ژێده‌رێن ئاڤێ و پێداچوونا ب جهئینانا پلانا چاندنێ هاتنه‌ كرن، ل دووڤ وێ پشكا ئاڤێ ئه‌وا بۆ پارێزگه‌هان هاتینه‌ په‌سه‌ند كرن.

بۆ ئه‌ڤێ مه‌ره‌مێ ژی، ئه‌و پرۆژێن هه‌ولێرێ ژلایێ پارێزگارێ هه‌ولێرێ ڤه‌ دچارچوڤێ پلانێن پارێزگه‌هان و حكومه‌تا هه‌رێما كوردستانێدا، بۆ ڕووبرووبوونا گوهۆرینێن سه‌قایى و بابه‌تێن له‌هییان و دابینكرنا ئاڤێ، ل هه‌یڤا ئادارا بووری ل ده‌مێ سه‌ره‌دانا سه‌رۆكوه‌زیرێن عیراقێ  بۆ هه‌ولێرا پایته‌خت هاتینه‌ پێشكێشكرن، دانوستاندن ل سه‌ر هاتنه‌ كرن، پشتی پرۆژه‌ ، ژلایێ پارێزگارێ هه‌ولێرێڤه‌ و شاندێ دگه‌لدا هاتییه‌ به‌رچاڤكرن، بووچونێن لژنێ كو چه‌ندین وه‌زیرێن حكومه‌تا عیراقێ و یێن هه‌رێما كوردستانێ تێدا ئه‌ندامبوون، هاتینه‌ وه‌رگرتن، ب كۆما ده‌نگان پرۆژه‌ هاته‌ په‌سه‌ندكرن و ئاراسته‌یی جڤاتا وه‌زیرێن حكومه‌تا عیراقێ هاته‌ كرن، هیڤی خواست د ده‌مه‌كێ نێزیكدا بودجا پێدڤی كو (14 ملیار دینارن)، بۆ ب جهئینانا پرۆژان ژلایێ حكومه‌تا عیراقێڤه‌ بهێته‌ دابین كرن.