ئاژانسا خانی:
په‌یڤدارێ دەستەیا وەبەرھێنانێ ل ھەرێما کوردستانێ دیار كر: نوكه ئه‌م به‌رهه‌ڤییان دكه‌ین بۆ ھاتنا شانده‌كێ بلندێ وه‌لاتی سعوودی بۆ هه‌رێما كوردستانێ ب مەره‌ما ئەنجامدانا پڕۆژێن مه‌زن و دروستکرنا هێله‌كا ئه‌سمانی بۆ ھنارتنا بەرھەمێن ناڤخۆیی یێن ھەرێما کوردستانێ بۆ وه‌لاتێ سعوودی.
بەرگەشت ئاکرەیی” زێده‌تر بۆ ئاژانسا خانی گۆت: بریارە شانده‌كێ بلندێ وه‌لاتێ سعوودی و کۆمپانییێن وەبەرھێنانێ یێن وی وه‌لاتی كو نێزیكی 60 كه‌سانه سەره‌دانا ھەرێما کوردستانێ بکه‌ن، وەزیرێ وەبەرھێنانا سعوودی دێ سه‌رۆكاتییا وی شاندی كه‌ت، نوكه ئه‌م یێ به‌رهه‌ڤییان دكه‌ین بۆ هندێ ده‌مێ ئه‌و شاندە دهێته ھەرێما کوردستانێ هژمارەکا دیداران ل گەل حکومەتێ و وەبەرھێنەرێن ھەرێمێ و ژوورێن بازرگانی و پیشه‌سازی یێن هه‌ر چار پارێزگه‌هێن ھەرێمێ ئەنجام بده‌ن، له‌وما ئه‌م ژی به‌رهه‌ڤییێن باش دكه‌ین هه‌تاكو دهێنە ھەرێما کوردستانێ، چونکی مه کۆمەكا پڕۆژێن مه‌زن به‌رهه‌ڤكرینه د سێکتەرێن پیشەسازی و ئاكنجیبوونێ و چاندنێ دا، ئه‌گه‌ره‌كێ زۆر هه‌یه وه‌به‌رهێنه‌رێن سعوودی چەندین هه‌ڤبەستێن بازرگانی ل كوردستانێ ئەنجام بدەن” دیسان ب هاتنا وی شاندی دێ په‌یوه‌ندیێن ئابووری و بازرگانی ل گه‌ل وه‌لاتێ سعوودی بهێز ئێخین.
ناڤهاتی گۆت ژی: مه دڤێت ئه‌و وەبەرھێنەرێن دهێنە ھەرێما کوردستانێ پڕۆژێن مه‌زن و یێن هه‌ڤپشك ژی ئەنجام بدەن” مه پێشنییاره‌ك ژی کرییە كو هێله‌كا ئه‌سمانی دناڤبه‌را هەرێما کوردستانێ و سعوودییه بۆ ھنارتنا بەرھەمێن ناڤخۆیی یێن ھەرێما کوردستانێ بهێته ڤه‌كرن” هه‌روه‌سا وه‌لاتێ سعوودی دێ پرۆژێ ئاڤا ئیفرازێ ل هه‌ولێرێ ب شێوێ قست چێكه‌ت و دێ هاریكارییا هه‌رێما كوردستانێ كه‌ت د ڤی واری دا” دیسان بریاره سه‌نته‌ره‌كێ مه‌زن یێ ب بازاركرنا به‌رهه‌مێن ناڤخۆیی ب تایبه‌تی ژی د بیاڤێ چاندنێ دا ل هه‌ولێرێ بهێته دامه‌زراندن و كارگه‌هه‌كا داگرتنا فێقی دێ ھێته چێكرن و به‌رهه‌مێن جۆتیارێن هه‌رێما كوردستانێ دێ هێنه ره‌وانه‌كرن بۆ وێ كارگه‌هێ و پاشی دێ هێنه ره‌وانه‌كرن بۆ وه‌لاتێ سعوودی” هه‌روه‌سا سه‌رۆكێ حكومه‌تا هه‌رێما كوردستانێ هه‌رده‌م ڤییایه ژێرخانا ئابووری ل هه‌رێما كوردستانێ بهێز بێخیت.
