بهایێ چوونا عومرێ د هه‌یڤا ڕه‌مه‌زانێدا ل ئه‌ڤساله به‌راورد دگه‌ل سالا بوورى زێده‌بوویه، ڕێڤه‌به‌رییا گشتییا ئه‌وقافا هه‌رێما كوردستانێ دیاردكه‌ت، گرانى و ئه‌رزانییا چوونا عومرێ ل سه‌ر عومره‌كارى دمینیت.
ل دووڤ بهایێن چه‌ند كۆمپانییێن حه‌ج و عومرێ، چوونا عومرێ ل 10 ڕۆژێن ده‌ستپێكێ یێن هه‌یڤا ڕه‌مه‌زانێ هه‌تا 1400 دۆلارێن ئه‌مریكییه، ل 15 ڕۆژێ دووماهییێ ژى دگه‌هیته 1850 دۆلاران.
كاروان ستوونى په‌یڤدارێ ڕێڤه‌به‌رییا گشتییا ئه‌وقافا هه‌رێما كوردستانێ سه‌باره‌ت بلندبوونا بهایێ چوونا عومرێ بۆ ئاژانسا خانى دیاركر، هه‌رده‌مێ داخوازى ل سه‌ر تشته‌كى زێده‌بوو دێ بهایێ وى بلند بیت، گرانى و ئه‌رزانییا چوونا عومرێ ل سه‌ر عومره‌كارى دمینیت، ئه‌گه‌ر عومره‌كار هۆتێلێن پێنج ستێر بگریت و ل جهێن گرانبها ئاكنجى بیت، دێ خه‌رجییێن عومرێ گه‌له‌ك گران ل سه‌ر وى ڕاوه‌ستن.
ئاشكرا ژى كر، چ سنوور بۆ دامه‌زراندنا كۆمپانییێن حه‌ج و عومرێ نینن، هه‌ر كه‌سه‌كێ بڤێت، دشێت ل دووڤ هنده‌ك مه‌رجان كۆمپانییه‌كێ بۆ خوه دابمه‌زرینیت، ئه‌وژى كو دڤێت ب كێماتى دوو عومره كربن، زمانێ عه‌ره‌بى باش ب زانیت، كه‌سه‌كێ خوانده‌ڤا و تێگه‌هشتى بیت و فه‌رمانبه‌رێ حكومى نه‌بیت.
