حكومەتا عیراقێ ڕۆژا 6 ئادارێ كو وەكو ڕۆژا نشتیمانی یا ” لێبوورین و پێكڤەژیانێ ” هاتبوو دیاركرن، هەلوەشاند.
ل دویڤ زانیارییان، ئەڤرۆ ل هەمی سازییێن عیراقێ دەواما فەرمییە و نەبوویە بهێنڤەدان. ئەڤە ددەمەكی دایە كو بەری دوو سالان، ڕۆژا 6 ئادارێ ل سەرتاسەری عیراقێ بهێنڤەدانا فەرمی بوو، لێ د سالناما حكومەتا عیراقێ یا سالا 2024 دا ئەڤ ڕۆژە هاتییە دەرئینان و نەبوویە بهێنڤەدان.
ڕۆژا 5 ئادارا 2021 پاپا فڕانسیس، پاپایێ ڤاتیكانێ سەرەدانا عیراقێ و هەرێما كوردستانێ كر و د پەراوێزا سەرەدانا خۆ دا ڕۆژا 6 ئادارێ ل گەل عەلی سیستانی، مەرجەعێ بلند یێ شیعەیێن عیراقێ کۆمبوو.
پشتی كۆمبوونا پاپا فرانسیس و سیستانی مستەفا کازمی، سەرۆکوەزیرێن پێشتر یێ عیراقێ د پۆستەکی دا ل تۆڕا جڤاكی یا ئێکس ڕاگەهاند، ” بە هەلكەفتا کۆمبوونا مێژوویی یا دناڤبەرا هەردوو جەمسەرێن ئاشتی و لێبوورینێ، مەرجەعێ شیعەیان عەلی سیستانی و پاپا فرانسیس و کۆمبوونا ئایینان ل باژێڕێ ئور یێ دیرۆكی، دەستنیشانکرنا 6 ئادارا هەمی سالان وەك ڕۆژەکا نشتیمانی بۆ لێبوورین و پێکڤەژیانێ ل عیراقێ ڕادگەهینین”.
