وه‌زاره‌تا بازرگانییا عیراقێ ده‌ست ب ئینانا گوشتێ سوورێ فرێش كرییه و دێ ب بهایه‌كێ ئه‌رزان ب سه‌ر پارێزگه‌هاندا به‌لاڤكه‌ت، داخواز هاتییه كرن پشكا هه‌رێما كوردستانێ ژى بهێته هنارتن و ڕه‌زامه‌ندى ل سه‌ر هاتییه دان.
هاجه‌ر تاهر ڕێڤه‌به‌رێ به‌لاڤكرنا ئاهێن خوارنێ ل پارێزگه‌ها دهۆكێ بۆ ئاژانسا خانى دیاركر، كۆمبوونه‌ك دناڤبه‌را ڕێڤه‌به‌رییێن پارێزگه‌هێن دهۆك، هه‌ولێر و سلێمانییێ و ڕێڤه‌به‌رییا گشتییا بازرگانییا هه‌رێما كوردستانێدا ل دۆر ئینانا گۆشتێ ئه‌رزان هاتییه كرن، پلانه‌ك هاتییه دانان، كو بازاره‌كێ فرۆتنا كه‌لوپه‌لێن خوارنێ و گوشتێ سوورێ فرێش ب بهایێن گۆنجاى بهێته ڤه‌كرن.
ئاماژه ب هندێ ژى دا، ئه‌وان ل دهۆكێ به‌رهه‌ڤى بۆ ڤه‌كرنا ڤى بازارى كرینه، چه‌ند كۆگه‌هێن خوه بۆ ڤى پرۆژه‌ى ته‌رخانكرینه و ل هیڤییێنه ده‌ست ب بجههئینانا وى بهێته‌كرن.
ژلایه‌كێ دیڤه نه‌وزاد شێخ كامل ڕێڤه‌به‌رێ گشتییێ بازرگانییێ ل هه‌رێما كوردستانێ دیاركر، ئه‌وان ده‌ست ب به‌رهه‌ڤییان بۆ دابینكرنا كۆگه‌هێن ساركرنێ كرییه و ئه‌و بخۆ دێ ب سه‌ر پارێزگه‌هاندا به‌لاڤكه‌ن.
