مەسرور بارزانی، سەرۆکێ حکومەتا هەرێما کوردستانێ ئەڤرۆ پێشوازی ل کریستیان ریتچەر، شیرەتكارێ تایبەت یێ سکرتێرێ گشتیێ نەتەوەیێن ئێكگرتی و سەرۆکێ تیما ڤەكۆلینێن نیڤدەولەتی د تاوانێن داعش (یونیتاد) کر.
سەرۆکێ تیما یونیتاد، سوپاس و پێزانینێن خۆ و تیما خۆ بۆ هەماهەنگیی و هاریكاریكرنا سازییێن حکومەتا هەرێما کوردستانێ ل گەل تیما یونیتاد دیاركر د سەرئێخستنا کارێن تیمێ د بوارێ كۆمكرن و ئەرشیفکرن و دیجیتالكرنا بەلگەیێن تاوانێن تیرۆریستی یێن داعش.
سەرۆکێ حکومەتێ دووپات ل گرنگییا پاراستنا مافێن قوربانییێن دەستێ تیرۆریستێن داعش و قەرەبووکرن و بەردەوامبوونا پشتەڤانیێن نیڤدەولەتی بۆ دادگاییکرنا تاوانبارێن داعش کر.
مەسرور بارزانی، سەرۆکێ حکومەتا هەرێما کوردستانێ دیاركر، كو پێدڤییە تاوانبارێن داعش، ل سەر تاوانێن کۆمەلکوژی و تاوانێن دژی مرۆڤایەتییێ بهێنە دادگەهكرن و بۆ ئەڤێ مەرەمێ، حکومەتا هەرێما کوردستانێ دێ بەردەوام بیت ل درێژەدان ب هاریکاری و هەماهەنگیکرن ل گەل جڤاكێ نیڤدەولەتی.
