مه‌سرور بارزانى پێشوازى ل كونسۆلێ نوو یێ بریتانیا كر

مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل ئه‌ندرۆ بیزلى كونسۆلێ گشتییێ نوو یێ بریتانیا ل هه‌رێما كوردستانێ كر.
ل دووڤ ڕاگه‌هاندنا حكومه‌تا هه‌رێما كوردستانێ سه‌رۆكوه‌زیران پیرۆزباهییا ده‌ستبكاربوونێ ل ئه‌ندرۆ بیزلى كر و هیڤییا سه‌ركه‌ڤتنێ د ئه‌ركێ ویدا بۆ خواست، هه‌موو پشته‌ڤانییا حكومه‌تا هه‌رێما كوردستانێ بۆ كونسۆلێ نوو ژ پێخه‌مه‌ت پێشڤه‌برنا زێده‌تر یا په‌یوه‌ندییێن ب هێز یێن دناڤبه‌را بریتانیا و هه‌رێما كوردستانێدا دیاركر.
كونسۆلێ گشتییێ نوو یێ بریتانیا حه‌زا وه‌لاتێ خۆ بۆ پتر ب هێزكرنا په‌یوه‌ندییێن هه‌موو لایانه‌ دگه‌ل حكومه‌تا هه‌رێما كوردستانێ دووپاتكر.
د ته‌وه‌ره‌كێ دییێ كۆمبوونا واندا، هزر و بیر ل دۆر گرنگییا چاره‌سه‌ركرنا ئاریشه‌یێن دناڤبه‌را هه‌رێما كوردستانێ و حكومه‌تا فیدرالدا هاتنه‌ لێكگۆهارتن.