مەسرور بارزانی، سەرۆكێ حكومەتا هەرێما كوردستانێ ئەڤرۆ د گۆتارەكێدا ڕاگەهاند، حکومەتا هەرێما کوردستانێ بێ جوداهییا ئایین، ڕەگەز و نەتەوەیی؛ مێهڤاندارییا سەدان هزار پەناخواز و پەنابەرێن وەلاتێن دەوروبەر و هەروەسا ئاوارێن ناڤخۆ یێن عیراقێ کرییە؛ ب تایبەت ل دەستپێكا هێرشا تیرۆرستی یا داعش، ب هزاران کەس بەرەف هەرێما کوردستانێ هاتینە.
سەرۆكێ حكومەتا هەرێمێ دیاركر، هەتا ئەڤرۆ ژی هەرێما کوردستانێ یا بەردەوامە د پاراستن و ڤەحەواندنا سەدان هزار پەنابەران، ئاوارە و پەنابەر ژ ئەگەرێ ترس و نەبوونا ئاسایش و ئارامییێ ل دەڤەرێ بەرەف هەرێما كوردستانێ هاتینە، ب مخابنی ڤە هەتا نوكە ژی ڕەوش ل وەلات و دەڤەران ئاسایی نەبوویە كە ڤەگەڕنەڤە.
سەرۆکوەزیران دووپات کر، “هەرێما کوردستانێ وەک هەردەم ب نموونەكا گەش و مێهڤان دۆستی و پەناگەهەكا ئارام دێ مینیت بۆ هەمی ئەوان یێن ژ زولم و ستەم و تیرۆرا دەڤەرێ د ترسن”.
مەسرور بارزانی دیاركر، بێگومان کەسێ پێ خۆش نینە ل ئاوارەی و پەنابەرییێدا بژیت و حکومەتا هەرێما کوردستانێ ژی هەردەم ل گەل هەمی ئەوان ئاوارە و پەنابەرانە یێن دڤێن ب حەزا خۆ ڤەگەڕن ب ڕێكا ئاساییکرنا ڕەوشا دەڤەرێ بۆ هندێ ب سەربلندی ڤەگەڕنە سەر جهێن خۆ.
