ئاژانسا خانی:
بریکارێ وەزارەتا چاندنێ و ژێده‌رێن ئاڤێ ل هه‌رێما كوردستانێ دیار كر: وەزارەتا چاندنا عێراقێ ڕێك ب هاوردەكرنا هنده‌ك بەرهەمان دایه” كو ئه‌و به‌رهه‌مێن چاندنێ ژ ئیرانێ دهێنه عیراقێ، کو ڤێ چه‌ندێ دێ کاریگەرییا خراب ل سەر بەرهەمێ ناڤخۆیی یێ جۆتیارێن هەرێما کوردستانێ هه‌بیت.
کەریم سلێمان، زێده‌تر بۆ ئاژانسا خانی دبێژیت “خشتێ چاندنێ، خشتەكه وەزارەتا چاندنا حکومەتا هەرێمێ ل گەل وه‌زاره‌تا چاندنا فیدرالی ڕێککەڤتن تێدا كرییە، لدووڤ وێ ڕێککەڤتنێ” هه‌كه بەرهەمه‌ك بهێته قەدەغە کرن یان ڕێك ب هاوردەکرنا بەرهەمه‌كێ بهێته دان” دڤێت ب هه‌ڤپشكی بیت دناڤبه‌را هه‌ردو ئالییان دا.
ناڤهاتی گۆت ژی: مخابنی هنده‌ك جاران وەزارەتا چاندنا عێراقێ ڕێكێ ب ئینانا هنده‌ك بەرهەمان ژ ده‌رڤه دده‌ت، کو ئەڤێ دێ کاریگەرییه‌كا خراب ل سەر بەرهەمێ ناڤخۆیی هه‌بیت، دێ زیانه‌كا مه‌زن ژی گه‌هینیته جۆتیارێن هەرێما کوردستانێ” هه‌ر چه‌نده گه‌له‌ك جاران مه بزاڤێن باشبوونا هەماهەنگییان كرینه” به‌لێ عیراق ئاسانکارییان ناکەت، مە جاره‌كا دیتر گۆتییه وه‌زاره‌تا چاندنا عیراقێ” بۆچی هه‌وه ڕێك دایە ئه‌و پێنج بەرهەمه بهێنه هاوردەكرن و ژ ئیرانێ بهێن؟ ” وان گۆتییه مه” نوكه ده‌مێ عاشوورایێ و چلەیا ئیمام حسێنییە، دێ گه‌له‌ك زیاره‌تكار هێنە عێراقێ، لەوا مه رێك دایه “خیار، تەماتە، پیڤاز و شوتی” بهێنه هاوردەکرن” به‌لێ هه‌كه ئەوان هەماهەنگی ل گەل وەزارەتا چاندنا هەرێمێ هەبایە، هه‌ر چه‌نده مه بۆ وان دیاركرییه” كو مه به‌رهه‌مه‌كێ باش ل هەرێما کوردستانێ هەیە، ڕەنگە بشێین پێدڤییێن بازاڕێ خوار و ناڤەڕاستا عیراقێ پێ پڕ بکەین”.
