ئه‌ڤرۆ دوشەمبی 4ی چریا دووێ یا 2024 ێ” ل سەلاحەدین سەرۆك مەسعود بارزانی پێشوازی ل خانم ئەلینا ڕۆمانوسكی بالیۆزا ئەمریكا ل عێراقێ كر.
د وێ دیدارێدا كو ستێڤ بیتنەر كونسولێ گشتییێ ئەمریكا ل هەولێرێ ئامادەببوو، بالیۆزا ئەمریكا ل عێراقێ پیرۆزباهییا سەركەڤتنا هەڵبژارتنێن 20 ی ئۆكتۆبەرا بوری یا پەرلەمانێ كوردستانێ ل سەرۆك بارزانی كر و ته‌كه‌زی ل سه‌ر برێڤه‌چوونا هەڵبژارتنێن پەرلەمانێ كوردستانێ د سه‌قایه‌كێ دیموكراسیانە و ئارامدا و د وێ ره‌وشا ئالۆزا ئه‌ڤ ده‌ڤه‌ره تێدا ده‌رباز دبیت كر، كو وێنەكێ شاییستەیێ هەرێما كوردستانێ نیشا هەموو لایەكی دا.
سەرۆك بارزانی سوپاسییا جڤاكێ نێڤدەولەتی و كۆمیسیۆنا بلندا هەلبژارتنان كر” كو زێده‌باری هه‌بوونا كۆمەكا كێشەیێن تەكنیكی” بەلێ ڕۆله‌كێ بەرچاڤ د سەركەڤتنا هەڵبژارتنێن پەرلەمانێ كوردستانێدا هەبوو. هه‌روه‌سا به‌حسێ پێنگاڤێن پێكئینانا حكومەتا نوو یا هەرێمێ و دانوساندنێن دناڤبه‌را لایه‌نان دا هاته كرن و سەرۆك بارزانی دیار كر: پارتی تیمه‌ك بۆ دانوستاندنان ل گەل لایەنان ل سەر پێكئینانا حكومەتێ و ئەجێندایێن حكومەتا داهاتی پێكئینایە و گۆت: پارتی ڤیتۆ ل سەر چ لایەنان نینە.
هەر د وێ كۆمبوونێدا رۆناهی خسته سەر ره‌وشا سیاسی و ئەمنییا ده‌ڤه‌رێ و داوی پێشهاتێن ڕۆژهەلاتا ناڤین” هەروەسا بیرورا ده‌ربارەیی پڕۆسا سیاسییا عێراقێ و هەلبژارتنا سەرۆكێ نوو یێ په‌رله‌مانێ عێراقێ لێكگۆهارتن.
