عێراق و هەرێما کوردستانێ دێ یاسایەکێ هه‌ڤپشك بۆ هاتنوچوونێ ده‌رئێخن

عێراق و هەرێما کوردستانێ یاسایەکێ هه‌ڤپشك دێ بۆ هاتنوچوونێ دەرئێخن و هه‌تا نوكه‌ دو کۆمبوون ل سه‌ر ئه‌وی بابه‌تی هاتینه‌ كرن.

سامی جەلال، شیره‌تکارێ وەزارەتا ناڤخۆیا هەرێما کوردستانێ، کو هه‌ڤده‌م سەرۆکا وێ لژنا وەزارەتا ناڤخۆیە بۆ گوتۆبێژكرنێ ل سه‌ر رەشنڤیسێ پرۆژەیاسایێ هه‌ڤپشكێ هاتنووچونێ ل گەل حکومەتا عێراقێ، دیار كر “وەزارەتا ناڤخۆیا هەرێما کوردستانێ رەشنڤیسێ پرۆژەیاسایەکێ نوو یێ هاتنوچوونێ ئامادەکرییە کو مه‌ مفا ژ ئەزموونا هەرێما کوردستانێ، وه‌لاتێن دەرووبەر و یێن جیهانی وەرگرتییە.”

ناڤهاتی گۆت ژی: ئه‌و ره‌شنڤیسه‌ لده‌ف وەزارەتا ناڤخۆیا عێراقێ یێ په‌سه‌ندە، له‌وما ل سەر بنەمایێ ئەوی رەشنڤێسی هەردو ئالییان لژنه‌ك پێکئینایە و گوتۆبێژان دکەن.”

هه‌تا نوكه‌ ئه‌وێ لژنێ دو کۆمبوون کرینە و ئێك ل بەغدا و ئێك ل هەولێرێ” هه‌روه‌سا عێراقێ و هەرێما کوردستانێ دو یاسایێن هاتنوچوونێ یێن تایبەت ب خۆڤه‌ هەنە؛ عێراقێ یاسایێ ژمارە 8 یێ سالا 2019 ێ هه‌یه‌؛ هەرێما کوردستانێ ژی یاسایێ ژمارە 86 یێ سالا 2004 ێ هه‌یه‌.