ئۆمێد خۆشناو، پارێزگارێ هەولێرێ ڕاگەهاند، داخستنا نڤیسینگەهێن کەنالێ (ئێن ئاڕ تی) ل هەولێرێ و باژێرێن دی یێن هەرێما کوردستانێ، ڕێکارەکێ یاساییە و ل سەر سکالا داواکارێ گشتی و ب بڕیارا دادگەهێ هاتییە بجهئینان، نەک وەک وێ چەندا دهێتە گۆتن کو بڕیارەکا سیاسی بیت.
پارێزگارێ هەولێرێ گۆت: ئەڤە دەمەکە ئەڤ کەنالە بێرێزییێ بەرامبەر سیمبۆلێن نیشتمانی دکەت، د دەمەکێ دا هندەک سیمبۆل هەنە کو لدووڤ یاسایا پەرلەمانێ کوردستانێ، دڤێت ئەو سیمبۆلە د پاراستی بن ژ بێرێزیپێکرنێ.”
ئومێد خۆشناو ئاشکرا کر ژی، دوهی ل دیوانا پارێزگەهێ ب ئامادەبوونا بەرپرسێن یاسایی و ناڤخۆ و نوونەرێ وەزارەتا رەوشەنبیری، بەرپرسێ نڤیسینگەها هەولێرێ یا (ئێن ئاڕ تی) هاتیە بانگهێشتکرن و بەلگەیێن ڤیدیۆیی و وێنەیی یێن بێڕێزیێن وان نیشان داینە و گۆت ژی: داخوازا رۆنکرنێ ژ وان هاتە کرن، بەلێ ئەو رۆنکرنا وان ئینایی یا باوەرپێکەر نەبوو، لەوما ل سەر بنەمایێ سکالا داواکارێ گشتی، دادگەهێ بڕیارا داخستنا هەموو نڤیسینگەهێن وی کەنالی ل هەرێما کوردستانێ دا.”
