نێچیرڤان بارزانی: تاوانا جینۆسایدا ئێزدییان برینه‌كا كویره‌ د دلێ گه‌لێ كوردستانێدا

نێچیرڤان بارزانی، سه‌رۆكێ هه‌رێما كوردستانێ ئه‌ڤرۆ په‌یامه‌ك ل دۆر سالڤه‌گه‌ڕا جینۆسایدا ئێزدییان به‌لاڤكر و ڕاگه‌هاند، تاوانا جینۆسایدا ئێزدییان ب سه‌ر کچ و ژن و تێکدانا مال و پەرستگەهێن وان، برینەکا كویره‌ د دل و دەروونێ گەلێ کوردستانێدا، مخابن وه‌لاتییێن ئێزدی پشتى 12 سالان، هێشتا باجا ناکۆکییێن سیاسی و ئامادەبوونا هێزێن چەکدارێن نەقانوونی ددەن.
سه‌رۆكێ هه‌رێما كوردستانێ دووپاتی ل هندێ كر، كو كارێ حکومەتا عیراقێ یه‌ ئاسایش و ئاڤەدانییێ بۆ شنگالێ ڤەگەڕینیت، کار بۆ پارێزگەھبوونا وێ بکەت و هێزێن نەقانوونی ده‌ڤه‌رێ بجهـبهێلن داكو ئاوارە ڤەگەڕن سەر جهێن خۆ.
نێچیرڤان بارزانی وه‌لاتییێن ئێزدی پشتڕاست دكه‌ت، هندی كه‌سه‌ك د ده‌ستێ داعـ*ـشدا مابیت، تیمێن نڤێسینگه‌ها ڕزگاربوویێن ده‌ستێ داعش دێ ل سەر کارێن خۆ بەردەوام بن بۆ ئاشکراکرنا چارەنڤیسێ وان، دێ بەردەوام بن ل سەر بزاڤێن خۆ یێن نێڤدەولەتی هه‌تا تاوانێن داعــ*ـش ل سەر ئاستێ جیهانێ ب وەك جینۆساید بهێته‌ نیاسین.