باژارێ روهایێ یێ باكورێ كوردستانێ ب كولتورێ خوه یێ زه‌نگین و ناڤدار ل جیهانێ و ب تایبه‌ت ژ روویێ موزیكێ ڤه ناڤدارییه‌كا تایبه‌ت هه‌یه، ئه‌و ژى ژبه‌ر ئاهه‌نگێن شه‌ڤێ و سترانگۆتن ل سه‌ر جادان و هه‌بوونا فه‌ستیڤالان، ژبه‌ر وێ یه‌كێ رێكخستنا په‌روه‌رده و ره‌وشه‌نبیرى یا سه‌ر ب نه‌ته‌وه‌یێن ئێكگرتى ڤه یونسكۆ، ئه‌و باژار بۆ باژارێ موزیكێ ل جیهانێ به‌ربژار كرییه.
رێڤه‌به‌رییا گه‌شتوگوزارێ ل پارێزگه‌ها روهایێ ل باكورێ كوردستانێ به‌رهه‌ڤیێن ته‌مام كرینه كو د وێ فه‌ستیڤالێ دا روها بشێت پلا ئێكێ بده‌ستڤه بینیت.
ل گۆره‌ى ئاگاهیێن میدیایا توركیا، ل رۆژێن 19 تا 21ێ ڤێ مه‌هێ ئه‌و فه‌ستیڤال دێ ب رێیا ئۆنلاین هێته سازكرن، ژبلى روهایێ ژى چه‌ندین باژارێن دى ژى تێدا هه‌نه و به‌ربژارن كو ببنه باژارێن موزیكێ ل جیهانێ وه‌كو باژارێ لیریا یێ ئسپانى، بۆگۆتا یێ كۆلۆمبی و باكۆ یا پایته‌ختێ ئازه‌ربیجانێ.
